मुख्य प्रशिक्षकको अनुपस्थितिमा पनि इन्टर मियामीले अमेरिकाको मजेर लिग सकरमा सानदार प्रदर्शन गरेको छ।
लियोनेल मेसीको चार गोलको मद्दतले मियामीले 'सीएफ मोन्ट्रियल'लाई ७-१ को भारी अन्तरले पराजित गर्यो। यो मियामीको इतिहासमै एकै खेलमा बनाएको सबैभन्दा धेरै गोलको कीर्तिमान हो।
मेसीले खेलको ४०औँ मिनेटमा फ्रि-किकमार्फत पहिलो गोल गर्दै टोलीलाई अग्रता दिलाए। ५२औँ मिनेटमा उनले उस्तै लोभलाग्दो 'सोलो रन' (एक्लै बल अघि बढाउँदै) मार्फत दोस्रो गोल गरे।
त्यसपछि लुइस सुआरेजलाई गोल गर्न पास (असिस्ट) मिलाइदिएका मेसीले खेल सकिन ७ मिनेट बाँकी छँदा गोलकिपरको माथिबाट चलाखीपूर्ण तरिकाले बल छिराउँदै (चिप गर्दै) आफ्नो ह्याट्रिक पूरा गरे।
तर मेसी यतिमै रोकिएनन्। खेलको अतिरिक्त समय (स्टपेज टाइम) मा उनले पुनः एक उत्कृष्ट फ्रि-किक प्रहार गर्दै चौथो गोल गरे।
मियामीका मिडफिल्डर क्यासेमिरोले मेसीको प्रशंसा गर्दै भने, 'टोलीमा मेसी हुनुको अर्थ यही हो। उनी इतिहास रच्ने खेलाडी हुन्, हामीले उनको खेलको आनन्द लिनुपर्छ।'
मेसीले आफ्नो खेल जीवनमा ८औँ पटक एकै खेलमा ४ वा सोभन्दा बढी गोल गरेका हुन्। सन् २०२० मा बार्सिलोनाबाट एइबार विरुद्ध ४ गोल गरेयता उनको यो पहिलो यस्तो उपलब्धि हो।
३९ वर्ष पुगेका मेसी 'मेजर लिग सकर' मा सबैभन्दा छिटो २० वटा खेलमा 'मल्टी-गोल' (दुई वा सोभन्दा बढी गोल) गर्ने खेलाडी बनेका छन्। उनी अहिले यस सिजनकमा १९ खेल खेल्दै १८ गोलका साथ शीर्ष स्थानमा छन्।
नियम उल्लंघनका कारण अन्तरिम प्रशिक्षक गुइलेर्मो होयोस प्रतिबन्धमा परेकाले यो खेल प्यारापिटबाट हेर्न बाध्य थिए। टोलीले नयाँ प्रशिक्षकको रूपमा 'किली गोन्जालेज'लाई नियुक्त गरिसकेको भए पनि वर्क पर्मिट (काम गर्ने अनुमति) नआएकाले उनी मैदानमा उत्रन पाएका थिएनन्। सहायक प्रशिक्षक राफेल पेरेजले टोलीको नेतृत्व गरेका थिए।
इन्टर मियामीका लागि ब्राजिलियन खेलाडी क्यासेमिरो र १८ वर्षीय अलेक्जेन्डर शले पनि एक–एक गोल गरे। यो जितसँगै मियामी इस्टर्न कन्फरेन्सको अंक तालिकामा दोस्रो स्थानमा कायमै छ। उता हार व्यहोरेको मोन्ट्रियल भने १४औँ स्थानमा खुम्चिएको छ।
