जुलियन अल्भारेज टोलीमा नभए पनि एट्लेटिको म्याड्रिडले स्पेनिस ला लिगामा आफ्नो उत्कृष्ट लय जारी राखेको छ।
शनिबार राति भएको खेलमा उसले सेभियालाई उसकै मैदानमा ३-१ ले पराजित गर्दै अंक तालिकाको शीर्ष स्थानमा उक्लिएको छ।
एट्लेटिकोले खेलको सुरुवातदेखि नै दबाब बनाएको थियो। खेलको चौथो मिनेटमै अलेजान्ड्रो बाएनाले गोल गर्दै टोलीलाई सुरुवाती अग्रता दिलाए।
२६औँ मिनेटमा एडेमोला लुकम्यानले बक्स बाहिरबाट उत्कृष्ट गोल गर्दै अग्रता दोब्बर बनाए। त्यसको केही बेरमै, अर्थात् ३३औँ मिनेटमा बाएनाले व्यक्तिगत दोस्रो गोल गरेपछि पहिलो हाफमै एथ्लेटिको ३-० ले अघि रह्यो।
दोस्रो हाफको ६६औँ मिनेटमा सेभियाका मिगुएल सिएराले एक गोल फर्काए पनि त्यो सान्त्वना मात्र बन्यो। यस जितसँगै ३ खेलबाट ७ अंक जोड्दै एथ्लेटिको तालिकाको पहिलो स्थानमा पुगेको छ भने सेभिया ६ अंकका साथ पाँचौँ स्थानमा छ।
टोलीका मुख्य फरवार्ड जुलियन अल्भारेज यो खेलमा अनुपस्थित थिए। उनी बार्सिलोना जान चाहेका कारण प्रशिक्षणमा समेत सहभागी भएका थिएनन्। म्याड्रिडले भने उनलाई बार्सिलोना पठाउनका लागि छलफल गर्न अस्वीकार गर्दै आएको छ। ट्रान्सफर विन्डो मंगलबार सकिँदैछ, जसले गर्दा उनको भविष्य अझै अनिश्चित छ।
