म्यानचेस्टर सिटीले चेल्सीका मिडफिल्डर एन्जो फर्नान्डेजलाई १२५ मिलियन पाउण्डमा अनुबन्ध गर्ने सहमति गरेको छ। यो बेलायती फुटबल इतिहासकै सबैभन्दा बढी सरुवा रकमको बराबरी हो।
गत वर्ष लिभरपुलले अलेक्जेन्डर इसाकका लागि १२५ मिलियन पाउण्ड तिरेर कीर्तिमान बनाएको थियो। एन्जो फर्नान्डेज यसअघि सन् २०२३ मा बेनफिकाबाट १०७ मिलियन पाउण्डमा चेल्सी आएका थिए।
विगत २४ घण्टादेखिको छलफलपछि दुवै क्लब सहमतिमा पुगेका हुन्। अब फर्नान्डेजको मेडिकल जाँच हुनेछ र उनले सिटीसँग लामो समयको लागि सम्झौता गर्नेछन्। सिटी र खेलाडीबीचको व्यक्तिगत सर्तहरूमा कुनै समस्या नहुने बताइएको छ।
अर्जेन्टिनाका एन्जो फर्नान्डेजले यसअघि चेल्सीमा रहँदा म्यानचेस्टर सिटीका वर्तमान प्रशिक्षक एन्जो मारेस्कासँग काम गरिसकेका छन्। मारेस्का उनलाई फेरि आफ्नो टोलीमा ल्याउन निकै इच्छुक थिए, किनकि यसै सिजन सिटीका धेरै मुख्य मिडफिल्डरहरूले क्लब छाडेका छन्।
पछिल्ला केही खेलहरूमा एन्जो चेल्सीको टोलीमा देखिएका थिएनन्। रिपोर्टहरूका अनुसार उनले आफैँ टोलीबाट बाहिर बस्न आग्रह गरेका थिए किनभने उनी सिटी जान चाहन्थे।
यो सिजन म्यानचेस्टर सिटीले आफ्नो ट्रान्सफर बजेटको पुरानो कीर्तिमान दुई पटक तोडिसकेको छ। यसअघि उनीहरूले इलियट एण्डरसनलाई ११६ मिलियन पाउण्डमा ल्याएका थिए।
सिटीबाट यसै सिजन रोड्रि (बार्सिलोना), बर्नार्डो सिल्भा (रियल मड्रिड) र साभियो (टोटेनहम) जस्ता खेलाडी बाहिरिएका छन्। यी खेलाडीको बिक्रीबाट सिटीले राम्रो आम्दानी पनि गरेको छ।
अर्कोतर्फ चेल्सीले यो सिजन खेलाडी बिक्रीबाट कीर्तिमानी ४०० मिलियन पाउण्ड भन्दा बढी आम्दानी गर्ने भएको छ। गत सिजन लिगमा १०औँ स्थानमा सीमित भएको र कुनै पनि युरोपेली प्रतियोगितामा छनोट हुन नसकेको चेल्सीलाई आफ्नो ठूलो टोली घटाउनु पर्ने दबाब थियो।
एन्जो फर्नान्डेज सुरुमा रियल मड्रिड जान चाहन्थे, तर स्पेनिस क्लबले उनलाई नभित्र्याउने स्पष्ट पारेपछि उनी सिटी जान तयार भएका हुन्।
