युइएफए नेसन्स लिगमा इंग्ल्यान्ड र स्पेनले जित हात पारेका छन्। इंग्ल्यान्डले प्रागमा १० खेलाडीमा सीमित चेक रिपब्लिकलाई २–० ले हराउँदा स्पेनले घरेलु मैदानमा क्रोएसियामाथि ४–१ को शानदार जित दर्ता गर्यो।
स्पेनका लागि १९ वर्षीय लामिन यामलले उत्कृष्ट प्रदर्शन गरे। उनले दुई गोल गर्नुका साथै एक गोलका लागि पास मिलाए। यामलले खेल सुरु भएको ७० सेकेन्डमै बायाँ खुट्टाले गोल गर्दै स्पेनलाई अग्रता दिलाएका थिए।
क्रोएसियाका डिओन बेल्जोले २८औं मिनेटमा इभान पेरिसिचको क्रसमा हेडमार्फत गोल गर्दै खेल बराबरीमा ल्याए। तर त्यसको तीन मिनेटपछि यामलको सटीक क्रसमा मार्क पुबिलले हेडमार्फत गोल गर्दै स्पेनलाई पुनः अग्रता दिलाए।
दोस्रो हाफमा यामलले बार्सिलोनाकै गोलरक्षक डोमिनिक लिभाकोभिचलाई नजिकको पोस्टबाट पराजित गर्दै व्यक्तिगत दोस्रो गोल गरे। निको विलियम्सले उत्कृष्ट ड्रिब्लिङपछि गोल थपेपछि स्पेन ४–१ ले विजयी भयो।
यससँगै स्पेनले समूह ‘ए३’ मा दुई खेलबाट ६ अंक जोडेको छ। उसको अपराजित यात्रा ४० खेलसम्म पुगेको छ।
उता, इंग्ल्यान्डले चेक रिपब्लिकलाई २–० ले पराजित गर्दै प्रतियोगितामा पहिलो जित निकाल्यो। घरेलु टोलीका पाभेल सुल्च २५औं मिनेटमै इलियट एन्डरसनमाथि खतरनाक ट्याकल गरेपछि रातो कार्ड पाउँदै मैदानबाट बाहिरिए।
१० खेलाडीमा सीमित चेकविरुद्ध ४७औं मिनेटमा ट्रेन्ट एलेक्जान्डर-अर्नोल्डको उत्कृष्ट क्रसमा एन्थोनी गोर्डनले हेडमार्फत गोल गरे।
त्यसपछि ६९औं मिनेटमा कप्तान ह्यारी केनले चेक डिफेन्डरहरूको गल्तीको फाइदा उठाउँदै बायाँ खुट्टाले गोल गरे। यो इंग्ल्यान्डका लागि केनको १२३ खेलमा ८७औं अन्तर्राष्ट्रिय गोल हो।
इंग्ल्यान्डले यसअघि स्पेनसँग घरेलु मैदानमा हार बेहोरेको थियो। अब शनिबार स्पेनले चेक रिपब्लिकसँग खेल्दा इंग्ल्यान्डले क्रोएसियाको सामना गर्नेछ।
