पहिलो खेलमा हार बेहोरेपछि नेपाल प्रिमियर लिग (एनपिएल) मा पुनरागमन गरेको सुदूरपश्चिम रोयल्सका ब्याटर इशान पाण्डेले टोलीले रणनीतिमा फर्किएर खेलेको बताएका छन्। उनले पोखरा एभेन्जर्सविरुद्धको जित टोलीका लागि निकै महत्त्वपूर्ण रहेको बताए।
बुधबार त्रिवि क्रिकेट मैदानमा सुदूरपश्चिमले पोखरालाई ६ विकेटले पराजित गरेको थियो। पोखराले दिएको १४६ रनको लक्ष्य सुदूरपश्चिमले १६.५ ओभरमा ४ विकेट गुमाएर पूरा गरेको थियो।
जितमा कप्तान दीपेन्द्रसिंह ऐरीले अविजित ५१ रन बनाउँदा इशानले ३१ बलमा ३७ रनको योगदान दिएका थिए। सुरुवातमै विकेट गुमाएर दबाबमा परेको सुदूरपश्चिमलाई दीपेन्द्र र इशानबीचको चौथो विकेटका लागि भएको ७४ रनको साझेदारीले जिततर्फ अघि बढाएको थियो।
खेलपछि प्रतिक्रिया दिँदै इशानले पहिलो खेलको हारपछि टोलीले आफ्नो खेल्ने शैलीमा सुधार गर्न खोजेको बताए। उनका अनुसार टोलीले ब्याटिङ अर्डरमा केही प्रयोग गरे पनि पोखराविरुद्ध रणनीतिअनुसार खेल्ने निर्णय गरेको थियो।
पहिलो खेलको नतिजापछि जित निकाल्नुले टोलीको आत्मविश्वास बढाउने अपेक्षा पनि उनले गरेका छन्।
पोखराविरुद्ध इशानको ब्याटिङ सुरुवातमा केही सुस्त देखिएको थियो। तर, उनले त्यसलाई परिस्थितिअनुसार लिइएको रणनीतिक निर्णयका रूपमा व्याख्या गरे।
लक्ष्य पछ्याउँदा आवश्यक रनको गति र खेलको अवस्था हेरेर अनावश्यक जोखिम नलिने आफ्नो योजना रहेको उनले बताए। क्रिजमा टिकेर खेल्दा पछि टोलीलाई लक्ष्य भेट्टाउन सहज भएको उनको विश्लेषण थियो।
सुदूरपश्चिमले ९ रनमै पहिलो विकेट गुमाएको थियो। त्यसपछि ४३ रनमा दोस्रो र ५६ रनमा तेस्रो विकेट गुमाउँदा टोली दबाबमा परेको थियो। यस्तो अवस्थामा इशान र दीपेन्द्रले चौथो विकेटका लागि ७४ रनको साझेदारी गर्दै खेलको दिशा परिवर्तन गरेका थिए।
इशान ३७ रन बनाएर आउट हुँदा सुदूरपश्चिम १३० रनमा पुगेको थियो। त्यसबेलासम्म टोलीलाई जितका लागि १६ रन मात्र आवश्यक थियो। त्यसपछि दीपेन्द्र र शेरफेन रदरफोर्डले टोलीलाई सहज जित दिलाए।
डिआरएस नेपाली क्रिकेटका लागि कोसेढुङ्गा
एनपिएलमा पहिलोपटक प्रयोग भइरहेको डिसिजन रिभ्यु सिस्टम (डिआरएस) लाई इशानले नेपाली क्रिकेटका लागि ऐतिहासिक उपलब्धिका रूपमा लिएका छन्।
उनका अनुसार प्रविधिको प्रयोगले अम्पायरका निर्णयमाथि पुनरावलोकन गर्ने अवसर उपलब्ध गराउँछ। खेलको सुरुवाती ओभरमा डिआरएसमार्फत केही महत्त्वपूर्ण निर्णय पुनरावलोकन हुँदा ब्याटरलाई राहत मिलेको उनको बुझाइ छ।
डिआरएसले खेलमा निष्पक्षता बढाउन सहयोग गर्ने भएकाले नेपाली क्रिकेटका लागि यसको प्रयोग महत्त्वपूर्ण रहेको उनले बताए। सुरुवातमै बंगलादेशी अम्पायर मसुदुर रहमानले दिएको तीनवटै
निर्णयलाई डिआरएसले उल्टाइदिएको थियो। त्यसपछि पनि डिआरएसले अम्पायरको निर्णयमा हस्तक्षेप गरेको थियो।
खेलमा अम्पायर रहमानका दुई एलबीडब्ल्यू निर्णयलाई डिआरएसले नटआउट करार गर्यो भने सुरुमा आउट नदिइएको कट बिहाइन्डको निर्णयलाई उल्टाउँदै आउट दियो।
पहिलो घटनामा दिनेश खरेललाई अम्पायरले एलबीडब्ल्यू आउट दिएका थिए। तर, डिआरएस लिएपछि उनी नटआउट ठहरिए। कट बिहाइन्डमा भने सुरुमा आउट नदिइएको निर्णय डिआरएसबाट उल्टियो।
यस्तै, कुशल भुर्तेल पहिलो बलमै एलबिडब्ल्यू आउट दिइएका थिए। तर, उनले पनि डिआरएसबाट जीवनदान पाए।
अनिल खरेलको प्रदर्शनबाट टोली सन्तुष्ट
सुदूरपश्चिमका बलर अनिल खरेलको प्रदर्शनबाट पनि इशान सन्तुष्ट देखिए। टोलीमा नयाँ भए पनि अनिल नेपाली क्रिकेटको वातावरणसँग परिचित र अनुभवी खेलाडी रहेको उनले बताए।
अष्ट्रेलियामा क्रिकेट खेलेको उनको अनुभवले टोलीलाई फाइदा पुगेको इशानको भनाइ थियो। पोखराविरुद्ध अनिलले प्रभावशाली बलिङ गर्दै ३ ओभरमा २३ रन खर्चेर ३ विकेट लिएका थिए।
पोखराका प्रमुख ब्याटरहरूलाई आउट गर्न सफल अनिलको प्रदर्शनले सुदूरपश्चिमलाई विपक्षी टोलीलाई १४५ रनमा सीमित राख्न मद्दत गरेको थियो। त्यसैले उनको प्रदर्शनलाई टोलीका लागि सकारात्मक पक्षका रूपमा हेरिएको छ।
पहिलो खेलमा पराजित भएपछि दोस्रो खेलमै जित निकाल्नु सुदूरपश्चिमका लागि महत्त्वपूर्ण बनेको छ। आधारभूत रणनीतिमा फर्किने निर्णय, अनिल खरेलको प्रभावकारी बलिङ र दीपेन्द्र–इशानको साझेदारीले टोलीलाई प्रतियोगितामा पुनरागमन गराएको छ।
