नेपाल प्रिमियर लिग (एनपिएल) मा बिहीबारको पहिलो खेलमा जनकपुर बोल्ट्सले काठमाडौं गोर्खाजलाई ८ विकेटले पराजित गरेको छ।
काठमाडौंलाई ११५ रनमा समेटेको जनकपुरले मोइन अलीको अर्धशतक र सैफ हसनको अविजित ४० रनको मद्दतमा १७.२ ओभरमै लक्ष्य पूरा गर्यो।
टस जितेर पहिले ब्याटिङ गरेको काठमाडौंले १९.३ ओभरमा सबै विकेट गुमाएर ११५ रन बनाएको थियो। जवाफमा जनकपुरले ११६ रनको लक्ष्य १६ बल बाँकी छँदै दुई विकेट गुमाएर भेट्टायो।
काठमाडौंलाई सस्तैमा समेट्ने क्रममा १६ वर्षीय बलर राहुल यादवले चार विकेट लिए। उनले चार ओभरमा ३१ रन खर्चिए। सैफ हसनले ११ रन दिएर दुई विकेट लिए भने मोइन अली, ललित राजवंशी र हरमीत सिंहले एक–एक विकेट हात पारे।
काठमाडौंको सुरुवात कमजोर, राहुलको लगातार विकेट
काठमाडौंले पहिलो ओभरमै साम हेजलेटलाई एक रनमा गुमायो। राहुल यादवको बलमा हेजलेट विकेटकिपर कुसल परेराबाट क्याच आउट भए। त्यसपछि तेस्रो ओभरको अन्तिम बलमा सैफ हसनले हरिशंकर शाहलाई नौ रनमा आउट गरेपछि काठमाडौं १९ रनमा दुई विकेट गुमाउने अवस्थामा पुग्यो।
स्मित पटेल र राशिद खानले तेस्रो विकेटका लागि १० रन थपे। पाँचौँ ओभरको पहिलो बलमा राहुलले पटेललाई १३ रनमा आउट गरेपछि काठमाडौं २९ रनमा तीन विकेट गुमाउन पुग्यो।
रशिद र भीम सार्कीले चौथो विकेटका लागि १८ रनको साझेदारी गरे। सातौँ ओभरको चौथो बलमा मोहम्मद अलीको बलमा राशिद १७ रन बनाएर आउट भए। त्यसपछि भीम र सुमित महर्जनले पाँचौँ विकेटका लागि २९ रन जोडे। ११.३ ओभरमा सुमित १० रनमा रनआउट भएपछि यो साझेदारी टुट्यो।
भीमले २९ बलमा चार चौकासहित ३३ रन बनाए। उनी १४.३ ओभरमा ललित राजवंशीको बलमा स्टम्पिङ भए। त्यसपछि काठमाडौंको इनिङ्स थप कमजोर बन्यो।
कप्तान करण केसी १८ बलमा आठ रन बनाएर राहुलको बलमा आउट भए। राहुलले त्यसपछि मोहम्मद आदिल आलमलाई शून्यमा एलबीडब्ल्यू आउट गरे। १७.१ ओभरमा जहान्दाद खान पाँच रनमा सैफ हसनको बलमा आउट भएपछि काठमाडौं ९९ रनमा नौ विकेट गुमाउने अवस्थामा पुग्यो।
रिपोन मन्डोलले दुई चौकासहित नौ रन बनाए। उनी हरमीत सिंहको बलमा आउट भएपछि काठमाडौंको इनिङ्स ११५ रनमा समाप्त भयो। शाहब आलम चार रनमा अविजित रहे।
काठमाडौंका लागि भीम सार्कीले सर्वाधिक ३३ रन बनाए। जनकपुरका राहुलले चार विकेट लिँदा सैफले दुई विकेट लिए।
मोइनको अर्धशतक, सैफसँग निर्णायक साझेदारी
११६ रनको लक्ष्य पछ्याएको जनकपुरले पहिलो ओभरमै त्रित राज दासलाई पाँच रनमा गुमायो। उनी रिपोन मन्डोलको बलमा स्मित पटेलबाट क्याच आउट भए।
मोइन अली र मयन यादवले दोस्रो विकेटका लागि ३० रन जोडे। मयन १० बलमा नौ रन बनाएर पाँचौँ ओभरको पहिलो बलमा रनआउट भएपछि जनकपुर ३७ रनमा दुई विकेट गुमाउने अवस्थामा पुग्यो।
त्यसपछि मोइन र सैफ हसनले जनकपुरलाई कुनै थप क्षति हुन दिएनन्। दुवैले तेस्रो विकेटका लागि अविजित ७९ रनको साझेदारी गर्दै टोलीलाई जितसम्म पुर्याए।
मोइनले ५१ बलमा तीन चौका र तीन छक्कासहित अविजित ५८ रन बनाए। उनले ४९ बलमा अर्धशतक पूरा गरेका थिए। सैफले ३९ बलमा एक चौका र तीन छक्कासहित अविजित ४० रन जोडे।
