नेपाल प्रिमियर लिग (एनपीएल) अन्तर्गत काठमाडौं गोर्खाज र चितवन राइनोजबीचको खेलमा दुवै टोलीले प्लेइङ–११ मा परिवर्तन गरेका छन्।
काठमाडौंले स्पिनर शहाब आलमको स्थानमा गणेश गौतमलाई टोलीमा समेटेको छ। यस्तै टस जितेर फिल्डिङ रोजेको चितवनले इंग्ल्यान्डका अनुभवी ब्याटर डेभिड मलानको स्थानमा कमिल मिलसारालाई खेलाएको छ।
करण केसीको कप्तानीमा रहेको काठमाडौंले प्लेइङ–११ मा गणेश गौतमलाई समेट्दा अन्य खेलाडीलाई निरन्तरता दिएको छ।
काठमाडौंको प्लेइङ–११ मा करण केसी (कप्तान), भीम सार्की, राशिद खान, साहिल पटेल, गणेश गौतम, सन्तोष यादव, आदिल आलम, जहानदाद खान, विल बोसिस्टो, शेहान अरागिचे र डेभिड वार्नर छन्।
यता, सिकन्दर राजाको कप्तानीमा रहेको चितवनले टस जितेर पहिले बलिङ गर्ने निर्णय गरेको छ। चितवनले डेभिड मलानको स्थानमा श्रीलंकाली खेलाडी कमिल मिलसारालाई प्लेइङ–११ मा राखेको छ।
चितवनको टोलीमा सिकन्दर राजा (कप्तान), कुशल मल्ल, रवि बोपारा, रिजन ढकाल, कमलसिंह ऐरी, अर्जुन साउद, विवेक कुमार यादव, रञ्जित कुमार, मौसम ढकाल, कमिल मिलसारा र टम टेयलर छन्।
अंक तालिकामा काठमाडौं चार खेलबाट ६ अंक जोड्दै दोस्रो स्थानमा छ। चितवन भने पाँच खेलबाट ५ अंकसहित चौथो स्थानमा रहेको छ।
दुवै टोलीका लागि यो खेल अंक तालिकामा आफ्नो स्थिति सुधार गर्ने अवसरका रूपमा रहेको छ।
