नेपाल प्रिमियर लिग (एनपिएल) सिजन–३ अन्तर्गत लुम्बिनी लायन्सले लिगको अन्तिम आफ्नो अन्तिम खेलमा विराटनगर किंग्सलाई ४ विकेटले पराजित गरेको छ। अन्तिम ओभरसम्म पुगेको रोमाञ्चक खेलमा रुबेन ट्रम्पलम्यानले छक्का प्रहार गरेपछि लुम्बिनीले १ बल बाँकी छँदै १६७ रनको लक्ष्य पूरा गर्यो।
कीर्तिपुरस्थित त्रिवि क्रिकेट मैदानमा विराटनगरले दिएको १६७ रनको लक्ष्य लुम्बिनीले १९.५ ओभरमा ६ विकेट गुमाएर पूरा गर्यो। लुम्बिनीको जितमा ओपनर डार्सी शर्ट र आसिफ शेखले समान ४५ रन बनाए। सन्दीप जोराले ११ बलमा अविजित २५ रन जोड्दा अली शेखले १९ बलमा २७ रन बनाए।
लुम्बिनीले लक्ष्य पछ्याउने क्रममा राम्रो सुरुवात गरेको थियो। शर्ट र आसिफले पहिलो विकेटका लागि ८६ रनको साझेदारी गरे। उनीहरूले ११.५ ओभरसम्म विराटनगरका बलरलाई विकेट लिन दिएनन्। शर्ट ३८ बलमा ३ चौका र १ छक्का प्रहार गर्दै ४५ रन बनाएर चरित असलंकाको बलमा आउट भए।
त्यसपछि विराटनगरले लगातार दुई विकेट लिँदै खेलमा फर्कने संकेत गर्यो। निरोशन डिकवेला र दिलीप नाथ खाता नखोली आउट भए। दुवैलाई अप्राजित पौडेलले लगातार ओभरमा आउट गरेका थिए। १२.४ ओभरमा डिकवेला आउट भए भने त्यसको अर्को बलमा नाथ पनि आउट भए।
आसिफले एक छेउ सम्हालिरहेका थिए। तर १३.५ ओभरमा उनी ४५ रन बनाएर रनआउट भए। त्यसबेला लुम्बिनीको स्कोर ९१ रन थियो। त्यसपछि कप्तान रोहित पौडेलले ९ रन बनाएर रनआउट हुँदा लुम्बिनी १२० रनमा ५ विकेट गुमाउने अवस्थामा पुग्यो।
अली शेख र सन्दीप जोराले छैटौँ विकेटका लागि ४२ रनको साझेदारी गर्दै लुम्बिनीलाई जितनजिक पुर्याए। अली १९ बलमा २७ रन बनाएर १९.४ ओभरमा आउट भए। त्यसबेला लुम्बिनीलाई २ बलमा ५ रन आवश्यक थियो।
अन्तिम ओभरमा लुम्बिनीलाई जितका लागि १६ रन चाहिएको थियो। विराटनगरका रुपेश सिंहले बलिङ गरेको ओभरको पहिलो बलमा अली शेखले छक्का प्रहार गरे। उक्त बल नोबलसमेत भएपछि लुम्बिनीले एकैपटक सात रन जोड्यो। फ्रि हिटमा अलीले दुई रन लिए।
त्यसपछि पाँच बलमा सात रन आवश्यक हुँदा अलीले एक रन लिए। सन्दीप जोराले अर्को बलमा एक रन जोडेपछि लुम्बिनीलाई तीन बलमा पाँच रन चाहियो। त्यसपछि अली शेखले प्रहार गरेको बल क्याच भएपछि लुम्बिनी दबाबमा परेको थियो। दुई बलमा पाँच रन आवश्यक रहेको अवस्थामा क्रिजमा आएका ट्रम्पलम्यानले अन्तिमभन्दा अघिल्लो बलमै छक्का प्रहार गर्दै लुम्बिनीलाई जित दिलाए।
यसअघि टस हारेर पहिले ब्याटिङ गरेको विराटनगरले निर्धारित २० ओभरमा ४ विकेट गुमाएर १६६ रन बनाएको थियो। उसका लागि चरित असलंकाले सर्वाधिक ६४ रन बनाए। उनले ४३ बलमा ६ चौका र १ छक्का प्रहार गरे। शुभम् रन्जनेले २४ बलमा अविजित ३१ रन बनाए।
इमरान शेखले २९ बलमा २४ रन बनाएका थिए। उनी रन लिने क्रममा खुट्टामा समस्या आएपछि रिटायर्ड हर्ट भएका थिए। लोकश बमले १५, इसुरु उडानाले ६ र बासिर अहमदले अविजित ६ रन बनाए।
विराटनगरले पहिलो विकेटका रूपमा लोकशलाई ३३ रनको अवस्थामा गुमाएको थियो। त्यसपछि इमरान र असलंकाले दोस्रो विकेटका लागि महत्वपूर्ण साझेदारी गर्दै टोलीलाई बलियो अवस्थामा पुर्याए। असलंकाले १८औँ ओभरको अन्तिम बलमा विकेट गुमाउँदा विराटनगर १४५ रनमा पुगेको थियो। उनले दुई जीवनदानको फाइदा उठाउँदै अर्धशतक पूरा गरेका थिए।
लुम्बिनीका लागि किशोर महतोले २ विकेट लिए भने रुबेन ट्रम्पलम्यान र अभिषेक गौतमले समान १ विकेट लिए। विराटनगरका अप्राजित पौडेलले लुम्बिनीको इनिङ्समा २ विकेट लिए।
लुम्बिनी शीर्ष दुईमा, काठमाडौं र चितवन पनि प्लेअफमा
यो जितसँगै लुम्बिनीले शीर्ष दुईमा रहँदै पहिलो क्वालिफायर खेल्ने पक्का गरेको छ। लिग चरणमा ७ खेलबाट ११ अंक जोडेको लुम्बिनी शीर्ष स्थानमा छ।
यसअघि नै प्लेअफमा स्थान सुरक्षित गरिसकेको सुदूरपश्चिम रोयल्स दोस्रो स्थानमा छ। लुम्बिनीको जित र विराटनगरको हारसँगै काठमाडौं गोर्खाज र चितवन राइनोजले पनि प्लेअफमा स्थान पक्का गरेका छन्।
यससँगै प्लेअफ पुग्ने चार टोलीको टुंगो लागेको छ। सुदूरपश्चिम, लुम्बिनी, काठमाडौं र चितवन अन्तिम चारमा पुगेका छन्। विराटनगरसँगै कर्णाली याक्स, जनकपुर बोल्ट्स र पोखरा एभेन्जर्सको यात्रा लिग चरणमै समाप्त भएको छ।
अब लिग चरणका खेलपछि शीर्ष दुई टोलीले पहिलो क्वालिफायर खेल्नेछन् भने तेस्रो र चौथो स्थानमा रहने टोलीले एलिमिनेटर खेल्नेछन्। पहिलो क्वालिफायर जित्ने टोली सिधै फाइनल पुग्नेछ। पराजित टोलीले एलिमिनेटरको विजेतासँग दोस्रो क्वालिफायर खेल्ने अवसर पाउनेछ।
