सिद्धार्थ बैंक नेपाल प्रिमियर लिग (एनपिएल) मा आज दुई खेल हुँदैछ।
त्रिवि मैदान कीर्तिपुरमा आज एनपिएल तेस्रो संस्करणको लिग चरणका अन्तिम दुई खेल हुन लागेको हो।
दिउँसो १ बजे हुने पहिलो खेलमा चितवन राइनोज् र कर्णाली याक्स भिड्दैछन्।
चितवन प्लेअफमा पुगिसकेको छ।
शनिबार लुम्बिनीले विराटनगरलाई पराजित गरेसँगै चितवनको प्लेअफ स्थान सुरक्षित भएको हो।
उसले प्लेअफमा काठमाडौं गोर्खाजसँग इलिमिनेटर खेल्नेसमेत तय भएको छ।
चितवनले लिग चरणका अहिलेसम्म ७ अंक जोडेको छ। आजको खेल जित्न सके उसको खातामा २ अंक जोडिनेछ।
कर्णाली लिग चरणमा ६ मध्ये ४ खेलमा पराजित हुँदै अंक तालिकामा पुछारबाट एक स्थान माथि छ।
आजको खेलमा जिते पनि हारे पनि कर्णाली घर फर्कनेछ।
दोस्रो खेल साँझ ५ बजे हुँदैछ।
लिगको अन्तिम खेलमा काठमाडौं गोर्खाजले पोखरा एभेन्जर्ससँग खेल्दैछ।
तालिकाको तेस्रो स्थानमा रहेको काठमाडौंको ८ अंक छ।
पोखराले एक मात्रै खेल जितेको छ। ऊ २ अंकसहित तालिकाको पुछारमा छ।
