नेपाल प्रिमियर लिग (एनपिएल) को दोस्रो क्वालिफायरमा चितवन राइनोजले सुदूरपश्चिम रोयल्सलाई १३४ रनको लक्ष्य दिएको छ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा टस जितेर पहिले ब्याटिङ गरेको चितवनले निर्धारित २० ओभरमा ९ विकेट गुमाएर १३३ रन बनायो।
चितवनका लागि डेभिड मलानले सर्वाधिक ७१ रन बनाए। उनले ५१ बलमा ९ चौका र २ छक्का प्रहार गरे। मलानले ३८ बलमा ८ चौका र १ छक्काको मद्दतले अर्धशतक पूरा गरेका थिए।
चितवनको सुरुवात भने निकै खराब रह्यो। टोलीले १५ रन जोड्दा नै ओपनर कमिल मिरशा (४) र देव खनाल (६) लाई गुमाएको थियो। दुवै विकेट पहिलो तीन ओभरभित्र झरेका थिए।
तेस्रो नम्बरमा आएका कप्तान रवि बोपारा पनि लामो समय टिक्न सकेनन्। उनी ८ बलमा १ रन बनाएर छैटौं ओभरमा आउट भए। चितवनले ३१ रन जोड्दा तीन महत्वपूर्ण विकेट गुमाइसकेको थियो।
त्यसपछि मलानले विवेककुमार यादवसँग चौथो विकेटका लागि २७ रनको साझेदारी गरे। विवेक ११ बलमा ३ रन बनाएर आउट भए। कुशल मल्ल पनि ५ बलमा १ रन बनाएर पवेलियन फर्किए। चितवनले ५९ रन पुग्दा पाँच विकेट गुमाएको थियो।
मलानले एकातिर इनिङ्स सम्हालिरहँदा अर्को छेउबाट विकेट झर्ने क्रम रोकिएन। उस्मा मीर २ रन बनाएर आउट भएपछि चितवन ६२/६ को अवस्थामा पुगेको थियो।
त्यसपछि मलानले सलाउद्दीन खानसँग सातौं विकेटका लागि ४० रनको महत्वपूर्ण साझेदारी गरे। सलाउद्दीनले १६ बलमा १८ रन बनाए। उनी १७औँ ओभरमा आउट भएपछि चितवनले पुनः विकेट गुमाउन थाल्यो।
कमलसिंह ऐरीले ८ बलमा १० रन बनाए। रिजन ढकाल ३ रनमा रनआउट भए। मलान भने अन्तिमसम्म क्रिजमा रहेर टोलीलाई सम्मानजनक योगफलसम्म पुर्याए।
सुदूरपश्चिमका लागि स्कट कुगेलेइनले सर्वाधिक ३ विकेट लिए। उनले ४ ओभरमा २७ रन खर्चिए। थारिन्दु रत्नायकेले २ विकेट लिए। दीपेन्द्रसिंह ऐरी, हेमन्त धामी र इशान पाण्डेले समान १ विकेट लिए।
चितवनको इनिङ्समा सुरुवाती विकेट पतन नै ठूलो दबाब बन्यो। पावरप्लेमा टोलीले ३२ रन बनाउँदा ३ विकेट गुमाएको थियो। त्यसपछि मलानको धैर्यपूर्ण ब्याटिङ र सलाउद्दीनसँगको ४० रनको साझेदारीले चितवनलाई १०० रनको आँकडा पार गराउन महत्वपूर्ण भूमिका खेल्यो।
विशेषगरी ६२ रनमा ६ विकेट गुमाएको अवस्थाबाट मलानले इनिङ्स सम्हाल्नु चितवनका लागि महत्वपूर्ण रह्यो। अन्तिम पाँच ओभरमा चितवनले ३ विकेट गुमाएर ४४ रन जोडेको थियो।
अब १३४ रनको लक्ष्य पछ्याउँदै सुदूरपश्चिमले फाइनल प्रवेशका लागि ब्याटिङ गर्नेछ। यस खेलको विजेताले शनिबार उपाधिका लागि लुम्बिनी लायन्ससँग प्रतिस्पर्धा गर्नेछ।