इरानका चर्चित स्ट्राइकर सरदार आजमुनलाई सन् २०२६ को विश्वकपका लागि इरानी राष्ट्रिय टोलीमा समावेश गरिएको छैन।
सरकारप्रति अविश्वासिलो रहेको आरोपका बीच उनलाई टोलीबाट बाहिर राखिएको खबर बाहिरिएको छ।
हाल संयुक्त अरब इमिरेट्सको 'शबाब अल-अहली' क्लबबाट व्यावसायिक फुटबल खेल्ने आजमुनले आफ्ना शासकहरूलाई रुष्ट पारेको बताइएको छ।
इरानको अमेरिका र इजरायलसँगको बढ्दो द्वन्द्वका बीच आजमुनले गत मार्च महिनामा यूएईका शासक मोहम्मद बिन रसिद अल मकतूमसँग एउटा तस्बिर खिचेर सार्वजनिक गरेका थिए।
सोही तस्बिरका कारण इरानी सरकार उनीसँग क्रुद्ध भएको विश्वास गरिएको छ।
द्वन्द्वका क्रममा इरानले यूएईका कतिपय क्षेत्रहरूमा आक्रमण समेत गरेको थियो।
आफ्नो देशका लागि ९१ खेलमा ५७ गोल गरिसकेका आजमुनलाई प्रशिक्षक अमिर घालेनोईले प्रारम्भिक टोलीमा पनि राखेका थिएनन्। राजनीतिक विवादका कारण इरानको विश्वकप सहभागिता नै अन्योलमा रहेका बेला उनलाई फेरि टोलीबाट बाहिर राखिएको हो।
सन् २०२६ को विश्वकप अमेरिका, क्यानडा र मेक्सिकोले संयुक्त रूपमा आयोजना गर्दैछन्, जुन जुन ११ बाट सुरु हुनेछ। इरानले आफ्नो प्रशिक्षण केन्द्र मेक्सिकोमा सारेको छ। मेक्सिकोकी राष्ट्रपति क्लाउडिया सेनबाउमले अमेरिकाले इरानी टोलीलाई स्वागत गर्न नचाहेका कारण यस्तो गरिएको दाबी गरेकी छिन्।
विश्वकपमा इरानले जुन १५ मा न्युजिल्याण्ड र जुन २१ मा बेल्जियमसँग लस एन्जलसमा खेल्नेछ भने जुन २६ मा इजिप्टसँग सियाटलमा प्रतिस्पर्धा गर्नेछ। आजमुन टोलीमा नभए पनि ३३ वर्षीय स्टार मेहदी तारेमी र अलिरेजा जहानबख्श भने टोलीमा परेका छन्।
विश्वकपका इरानी टोली
गोलकिपर
अलिरेजा बेइरानभान्ड, पायम नियाजमन्द, होसेन होसेनी।
डिफेन्डर
एहसान हज्साफी, मिलाद मोहम्मदी, अली नेमाती, शोजाई खलिलजादेह, होसेन कनानीजादेगन, दानियल एरी, रामिन रेजाईयान, सालेह हरदानी।
मिडफिल्डर
सामान घोडोस (कल्बा, यूएई), सइद एजातोलाही (शबाब अल-अहली, यूएई), मोहम्मद घोरबानी (अल-वाहदा, यूएई), रोजबेह चेश्मी, अमीरमोहम्मद रज्जाघिनिया, मोहम्मद मोहेबी (रोस्तोभ, रुस), मेहदी तोराबी, मेहदी घायेदी (अल-नसर, यूएई), अलिरेजा जहानबख्श, अरिया युसेफी।
फरवार्ड
मेहदी तारेमी (ओलम्पियाकोस, ग्रीस), अमीरहोसेन होसेनजादेह, अली अलीपुर, शहरियार मोघान्लो (कल्बा, यूएई), डेनिस एकर्ट (इरानमा डेनिस दर्गाही भनेर चिनिने, स्ट्यान्डर्ड लिज, बेल्जियम)।
