PLAYERS TO WATCH
२३ वर्षको उमेरमै विश्व फुटबलको केन्द्रविन्दुमा रहेका जमाल मुसियाला केवल एउटा नाम मात्र होइनन्, उनी जर्मन फुटबलको एउटा नयाँ युगका प्रतीक हुन्।
सन् १९९० को विश्वकप विजेता कप्तान लोथर म्याथ्युजले उनलाई 'भविष्यको मेस्सी' को संज्ञा दिनु कुनै अतिशयोक्ति होइन। उनको खेलमा त्यो जादू छ, जसले विपक्षी रक्षापंक्तिलाई क्षणभरमै छिन्नभिन्न पार्न सक्छ।
सन् २०२६ को फिफा विश्वकपको माहोल तातिरहेका बेला जर्मनीका यी आक्रामक मिडफिल्डर मुसियाला आफ्नो करियरकै सबैभन्दा महत्त्वपूर्ण मोडमा उभिएका छन्।
मुसियालाको पृष्ठभूमि कुनै चलचित्रको कथाभन्दा कम छैन। जर्मनीको स्टुटगार्टमा जन्मिएका मुसियालाका पिता ब्रिटिस-नाइजेरियन र आमा जर्मन हुन्।
सात वर्षको कलिलो उमेरमा परिवारसँगै इंग्ल्यान्ड सरेका मुसियालाले त्यहीँको मैदानमा फुटबल सिके।
साउथ ह्याम्प्टन र चेल्सी जस्ता विश्वप्रसिद्ध फुटबल एकेडेमीमा आफ्नो सीप तिखारेका उनले इंग्ल्यान्डको उमेर समूहका विभिन्न टोलीबाट अन्तर्राष्ट्रिय खेल पनि खेले। उनले इंग्ल्यान्डको यू-१५, यू-१६, यू-१७ र यू-२१ टोलीबाट समेत खेलेका थिए।
तर १६ वर्षको उमेरमा उनले आफ्नो जीवनको सबभन्दा ठूलो निर्णय लिए—चेल्सी छोडेर बायर्न म्युनिख जाने र इंग्ल्यान्डको सट्टा जर्मनीको राष्ट्रिय टोली रोज्ने।
उनले बिबिसीसँगको अन्तर्वार्तामा भनेका थिए, ‘यो निकै कठिन निर्णय थियो। मैले लामो समय यसबारे सोचेँ, तर अन्ततः मेरो मनले जहाँ सहज महसुस गर्यो, त्यही बाटो रोजें।’
आज उनी भन्छन्, ‘मलाई त्यो निर्णयमा कुनै पछुतो छैन।’
फुटबलमा इंग्ल्यान्ड र जर्मनी कट्टर प्रतिद्वन्द्वी हुन्। यस्तो अवस्थामा उनलाई इंग्ल्यान्ड छाडेर जर्मनी रोज्नु पक्का पनि सहज थिएन।
इंग्ल्यान्डप्रतिको उनको प्रेम अझै कायमै छ, विशेष गरी जुड बेलिङ्घम जस्ता पुराना साथीहरूसँगको मित्रताले उनलाई इंग्ल्यान्डसँग भावनात्मक रूपमा जोडेको छ। बेलिङघमसँग उनले इंग्ल्यान्डको उमेर समूहको राष्ट्रिय टोलीबाट सँगै खेलेका थिए।
मुसियालाले बायर्न म्युनिखमा पाइला टेकेको ११ महिनामै सिनियर टोलीमा स्थान बनाए।
१७ वर्षको उमेरमा बुन्डेसलिगा खेल्ने र गोल गर्ने सबैभन्दा कान्छा खेलाडी बनेर उनले इतिहास रचे। उनको प्रतिभा यति प्रभावशाली थियो कि उनले च्याम्पियन्स लिगमा लाजियो विरूद्ध गोल गर्दै युरोपेली प्रतियोगितामा पनि सबभन्दा कान्छो गोलकर्ताको कीर्तिमान आफ्नो नाममा गरे।
उनी मैदानमा जति शान्त देखिन्छन्, उनको खेल उति नै आक्रामक र चतुर छ। थोमस हिट्जल्सपर्जरका अनुसार, ‘साँघुरो घेराभित्र पनि निकास निकाल्न सक्ने र कडा ट्याकलहरूलाई सहजै झेल्न सक्ने उनको हिम्मत अचम्मको छ।’
जर्मन फुटबलमा यस्तो गुण भएको खेलाडी दशकौंपछि देखिएको विज्ञहरूको भनाइ छ।
तर सफलताको शिखर चढिरहेका मुसियालाका लागि यो सिजन सहज रहेन। फिफा क्लब विश्वकपमा पेरिस सेन्ट जर्मेन (पिएसजी) विरूद्धको खेलमा गोलकिपर जियानलुइजी डोनारुम्मासँगको ठक्करबाट उनले गम्भीर चोट बोके। उनको खुट्टा भाँचियो र कुर्कुच्चा पनि मर्कियो। यो कुनै पनि खेलाडीका लागि मानसिक र शारीरिक रूपमा विक्षिप्त बनाउने क्षण थियो।
‘मैले त्यो चोटबाट धेरै कुरा सिकें, मुसियालाले बुन्डेसलिगासँगको एक विशेष अन्तर्वार्तामा भने, ‘चोटबाट फर्किँदा अतिरिक्त कडा मिहिनेत चाहिन्छ। कहिलेकाहीँ प्रश्नहरूबाट टाढा रहेर केवल खेलको बहावसँगै बग्नुपर्दो रहेछ।’
कठिन पुनरागमनपछि अहिले उनी फेरि लयमा फर्किएका छन्। पछिल्ला सात लिग खेलमा पाँच गोलमा प्रत्यक्ष योगदान पुर्याएर उनले आफू विश्वकपका लागि तयार रहेको संकेत दिएका छन्।
जर्मनीका लागि पछिल्ला दुई विश्वकप (२०१८ र २०२२) बिर्सनलायक रहे। समूह चरणबाटै बाहिरिनु जर्मन फुटबलका लागि ठूलो धक्का थियो। तर, प्रशिक्षक जुलियन नागेल्सम्यानको आगमनसँगै टोलीमा नयाँ ऊर्जा देखिएको छ। नागेल्सम्यान भन्छन्, ‘मुसियाला ९५ प्रतिशत मात्र फिट हुँदा पनि विश्व फुटबलका उत्कृष्ट खेलाडी हुन्।’
यसपटक जर्मनीको टोलीमा युवा र अनुभवी खेलाडीको उत्कृष्ट मिश्रण छ। म्यानुएल नोयरको संन्यासपछिको पुनरागमनले टोलीको मनोबल उच्च बनाएको छ भने जोसुवा किमिच र एन्टोनियो रुडिगर जस्ता अनुभवी खेलाडीको साथले मुसियाला र विर्ट्ज जस्ता युवाहरूलाई खुलेर खेल्ने वातावरण दिएको छ।
टोलीमा अहिले मुसियालाको मात्र होइन, १८ वर्षीय लेनार्ट कार्लको पनि उत्तिकै चर्चा छ। मुसियाला आफैं पनि कार्लको खेलबाट प्रभावित छन्।
‘लेनार्टको आत्मविश्वास फरक छ, उनी टोलीका लागि ठूलो सम्पत्ति हुन्,’ मुसियालाले भने।
मुसियाला, फ्लोरियन विर्ट्ज र लेनार्ट कार्लको यो त्रिकोणात्मक आक्रमणले विश्वकप २०२६ मा कुनै पनि रक्षापंक्तिलाई ध्वस्त पार्ने क्षमता राख्छ।
विश्वकप २०२६ मा जर्मनी समूह 'ई' मा छ। जुन १४ मा कुरासाओ विरूद्धको खेलबाट जर्मनीले आफ्नो अभियान सुरू गर्नेछ। त्यसपछि आइभोरी कोस्ट र इक्वेडरसँगको भिडन्तले जर्मनीको वास्तविक परीक्षा लिनेछ।
मुसियालाका लागि यो केवल एउटा प्रतियोगिता मात्र होइन, यो आफूलाई विश्वकै सर्वोत्कृष्ट खेलाडीका रूपमा प्रमाणित गर्ने मञ्च पनि हो।
मुसियालाका अनुसार, ‘युरो २०२४ मा हामीले देखायौं कि हामी विश्वका बलिया दाबेदार हौं। अबको लक्ष्य भनेको मैदानमा र मैदान बाहिर एक परिवार भएर अघि बढ्नु र जर्मनीलाई फेरि विश्व विजेता बनाउनु हो।’
चोटलाई जितेर, आलोचनालाई पन्छाउँदै र आफ्नो प्रतिभालाई निखार्दै मुसियाला अहिले जुन स्थानमा छन्, त्यसले उनलाई विश्वकप २०२६ को सबैभन्दा प्रभावशाली खेलाडी बनाउने निश्चित छ।
जर्मनीले १२ वर्षपछि फेरि विश्वकप ट्रफी उचाल्ने सपना देखिरहँदा, त्यो सपनाको मुख्य पात्र जमाल मुसियाला नै हुनेछन्। यदि उनले आफ्नो स्वाभाविक खेल देखाउन सके भने लोथर म्याथ्युजले भने जस्तै उनी साँच्चिकै 'भविष्यको मेस्सी' साबित हुनेछन् र विश्व फुटबलमा एउटा नयाँ इतिहास लेखिनेछ।
