विजय बराल र अञ्जना बराइली अभिनीत फिल्म 'सिन्दुरे जात्रा'को टिजर सार्वजनिक भएको छ। निर्माण टिमले बुधबार दिउँसो ओएसआर डिजिटलको युट्युबमार्फत टिजर सार्वजनिक गरेको हो।
टिजरमा फिल्मका मुख्य कलाकार विजय र अञ्जनासहित कमलमणि नेपाल र विनोद न्यौपाने देखिएका छन्। प्रेम, खुसी, धोका र पीडालाई समेटिएको टिजर मौलिक परम्परागत संस्कृतिको झल्कोसहित सुरू हुन्छ।
टिजरमा विजय र अञ्जनाबीचको प्रेम, विवाह र खुसी देखाइएको छ। त्यसपछि कथामा विनोद न्यौपानेको प्रवेशसँगै द्वन्द्व सिर्जना हुन्छ। उनको प्रवेशपछि वियोगमा परेका विजय र धोका तथा पीडा भोगेकी अञ्जनाको अवस्था टिजरमा प्रस्तुत गरिएको छ। प्रेमिल माहोलबाट सुरू भएको टिजर अन्त्यतिर भने कलाकारको पीडा र भावनात्मक उतारचढावमा पुगेर टुंगिन्छ। गाउँले परिवेशले टिजरलाई थप मौलिक र नोस्टाल्जिक बनाएको छ।
'सिन्दुरे जात्रा' सरोज पौडेलले निर्देशन गरेका हुन्। 'पूर्णबहादुरको सारंगी'पछि विजय र अञ्जनाको यो दोस्रो सहकार्य हो।
फिल्ममा उषा खड्गी, रामप्रसाद खनाल, लोकेन्द्र लेखक, भोलाराज सापकोटा, हिउँवाला गौतम, राकेश खड्का, युना खड्का, अनिता गिरी, रजनी गुरूङ, देशभक्त खनाल र विनोद परियारलगायत कलाकारको समेत अभिनय छ।
सबिन अधिकारी र वसन्त न्यौपानेको लेखन रहेको फिल्मको कथा निर्देशक पौडेल स्वयंले तयार पारेका हुन्।
सारंगी फिल्म्सको प्रस्तुतिमा निर्माण भएको फिल्मका निर्माता नेम महर्जन हुन्। राकेश खड्का र श्याम मगर सह-निर्माता तथा सुमन रञ्जित एसोसिएट निर्माता छन्। अनिश अधिकारी लाइन निर्माता र दिनेश खड्का कार्यकारी निर्माता हुन्।
फिल्ममा पदमबहादुर श्रेष्ठ (बाबु) को छायांकन, सुरेन्द्र पौडेलको सम्पादन र विशाल घिमिरेको क्रिएटिभ निर्देशन छ। त्यस्तै प्रशान्त सिवाकोटीको संगीत छ।
'सिन्दुरे जात्रा' मंसिर १८ गतेदेखि प्रदर्शन तयारीमा छ।