भारतीय फिल्म 'सैयारा' ले बक्स अफिसमा बलियो ओपनिङ गरेको छ। नयाँ कलाकार अहान पाण्डे र अनीत पड्डालाई लिएर निर्माण गरिएको फिल्मले स्टारका फिल्मलाई पनि चुनौती दिँदै २०२५ कै चौथो ठूलो ओपनिङ गरेको हो।
'आशिकी २' फेम्ड निर्देशक मोहित सुरीको म्युजिकल रोमान्टिक फिल्म 'सैयारा' शुक्रबारदेखि प्रदर्शनमा आएको छ।
फिल्मले पहिलो दिन भारतमा २० करोड भारू नेट कलेक्सन गरेको भारतीय संचारमाध्यमले जनाएका छन्।
फिल्मले अपेक्षा भन्दा बढी कमाउँदै रेकर्ड पनि बनाएको छ। यो रेकर्ड अहान पाण्डेको नामसँग जोडिएको छ। 'सैयारा' पहिलो दिन कुनै पनि अभिनेताको सबैभन्दा धेरै कमाइ गर्ने डेब्यु फिल्म बनेको छ।
यो 'छावा', 'सिकंदर' र 'हाउसफुल ५' पछि वर्षको चौथो ठूलो ओपनिङ फिल्म पनि बनेको छ।
'सैयारा' ले अजय देवगनको 'रेड २', अक्षय कुमारको 'स्काई फोर्स' र सनी देओलको 'जाट' लाई पनि पहिलो दिनको कलेक्समा पछि पारेको भारतीय संचारमाध्यम नवभारत टाइम्सले जनाएको छ। बक्स अफिसमा अहान पाण्डेले अन्य स्टार किड्सलाई पनि उछिनेका छन्।
यशराज फिल्म्सको ब्यानरमा बनेको 'सैयारा' को बजेट ४५ करोड रूपैयाँ रहेको जनाइएको छ। अब फिल्मले शनिबार र आइतबार पनि राम्रो व्यापार गर्ने अपेक्षा गरिएको छ। अहान र अनितको नयाँ जोडी, हिट रोमान्टिक गीतहरू, र फिल्मले पाएको चर्चाले दर्शकहरू आकर्षित छन्।
फिल्मले पहिलो सप्ताहन्तमै आफ्नो बजेट सुरक्षित गर्ने र त्यसपछि नाफा कमाउन थाल्ने अनुमान गरिएको छ।
यो फिल्म नेपालका हलमा पनि प्रदर्शन भइरहेको छ।
-1746009348.jpg)
