बलिउड फिल्म 'दृश्यम ३' लाई लिएर निर्माता कुमार मंगत पाठक र अभिनेता अक्षय खन्नाबीच विवाद देखिएको छ।
निर्माता पाठकले अक्षयले सम्झौता गरेर एडभान्स रकम लिइसकेपछि पनि छायांकनको केही दिनअघि अचानक फिल्म छाडेको आरोप लगाएका छन्।
'धुरन्धर' बक्स अफिसमा सुपरहिट भएपछि अक्षयले 'दृश्यम ३' छाडेको कुरा केही दिनदेखि चर्चामा छ।
यसैबीच, निर्माताले अक्षयको ठाउँमा जयदीप अहलावतलाई लिइएको पुष्टि गरेका छन्।
अक्षयले फिल्मबाट हात झिकेपछि निर्माण टोली समस्यामा परेको कुमार मंगत पाठकको दाबी छ।
निर्माता पाठकले अक्षय खन्नाको व्यवहारलाई अव्यावसायिक भन्दै आलोचना गरेका छन्। छायांकनको १० दिनअघि फिल्म छाड्दा ठूलो आर्थिक क्षति पुगेको बताउँदै निर्माताले अक्षय खन्नाविरूद्ध क्षतिपूर्तिको मागसहित कानुनी नोटिससमेत पठाएको बताएका छन्।
निर्माता कुमार मंगत पाठकले भनेका छन्, 'उनको व्यवहारका कारण हामीलाई ठूलो आर्थिक घाटा भयो। म कानुनी कारबाहीमा जाँदैछु। पहिले नै कानुनी सूचना पठाइसकेको छु। उनले जबाफ दिएका छैनन्।'
निर्माताले अक्षयबीच के विषयमा मतभेद भएको हो भन्नेबारे बलिउड हंगामासँगको कुराकानीमा खुलाएका छन्। उनका अनुसार अक्षयले पछिल्लो समय फोन उठाउनसमेत छाडेका थिए।
उनले अक्षयसँगको विवाद पारिश्रमिकलाई लिएर नभएको बताए। उनका अनुसार पारिश्रमिकमा सहमति भएपछि सम्झौता भएको थियो। अक्षयको कस्टयुमका लागि समेत भुक्तानी भइसकेको अवस्थामा अचानक फिल्म छाडेको निर्माताको आरोप छ।
उनका अनुसार अक्षयले आफ्नो भूमिकामा लागि विग (कृत्रिम कपाल) प्रयोग गर्न जोड दिएका थिए। तर फिल्मको निरन्तरता र पात्रको यथार्थताका कारण निर्देशक अभिषेक पाठकले त्यसलाई उपयुक्त ठानेका थिएनन। अक्षयले सुरूमा यो विषयमा सहमति जनाए पनि पछि फेरि विगकै माग दोहोर्याएको निर्माताको भनाइ छ। यही विषयलाई लिएर विवाद बढ्दै जाँदा उनले अन्ततः फिल्मबाट अलग हुने निर्णय गरेका थिए।
निर्माताले 'धुरन्धर' ठूलो हिट भएपछि अक्षयमा घमण्ड पलाएको आरोप लगाए। उनले भनेका छन्, 'दृश्यम फ्रेन्चाइजीको नेतृत्व अजय देवगनले गरिरहेका छन् भन्ने कुरामा पनि ध्यान दिनुपर्छ। छावा अक्षयसँगै विक्की कौशलको फिल्म हो। धुरन्धरको लागि पनि यही कुरा लागू हुन्छ– यो रणवीर सिंहको फिल्म हो। यदि अक्षयले एकल फिल्म गरे भने यसले भारतमा ५० करोड रूपैयाँ पनि कमाउँदैनथ्यो। उनी सोच्छन् कि उनी अब सुपरस्टार हुन्। सफलता उनको दिमागमा पसेको छ।'
निर्माता पाठकले अक्षयको स्थानमा जयदीपलाई लिएर छायांकन थालिने बताए। उनले जयदीपलाई उत्कृष्ट अभिनेता मात्र नभइ व्यवसायिक र सहयोगी व्यक्ति भएको भन्दै प्रशंसा गरेका छन्।
-1756794700.JPG)
-1746009348.jpg)
