बलिउड अभिनेता कार्तिक आर्यनको आइतबार परेको जन्मदिनको अवसर पारेर नयाँ फिल्म निर्माणको घोषणा गरिएको छ। निर्माता तथा निर्देशक करण जोहरले कार्तिकको नयाँ फिल्म घोषणा गरेका हुन्।
करणले कार्तिकलाई मुख्य भूमिकामा लिएर फिल्म 'कालिया' निर्माण गर्ने भएका हुन्। आइतबार टिजर सार्वजनिक गर्दै फिल्मबारे जानकारी दिइएको हो।
मोन्स्टर थ्रिलर विधामा निर्माण हुने फिल्म भारतीय पौराणिक कथा र लोकविश्वासमा आधारित रहने जनाइएको छ। सार्वजनिक टिजरले भगवान् श्रीकृष्ण र कालिया नागको कथालाई नयाँ तथा रहस्यमय शैलीमा प्रस्तुत गरेको छ।
धर्मा प्रोडक्सन र डोपामाइन स्टुडिओको ब्यानरमा निर्माण हुने फिल्मलाई सन्दीप मोदीले निर्देशन गर्नेछन्। यसअघि 'द नाइट म्यानेजर' र 'आर्या' जस्ता सिरिजमा काम गरिसकेका मोदीले यही फिल्मबाट हिन्दी फिल्म निर्देशनमा डेब्यू गर्नेछन्।
फिल्ममा करण जोहर, आदर पुनावाला, अपूर्व मेहता, सोमेन मिश्रा, मारिजके डिसुजा र कार्तिक आर्यन निर्माता रहनेछन्। निर्माण पक्षका अनुसार 'कालिया' सन् २०२८ मे ५ मा हलमा प्रदर्शनमा आउनेछ।
यस फिल्ममार्फत कार्तिक पहिलोपटक मोन्स्टर थ्रिलर विधामा देखिन लागेका हुन्।