अजय देवगन स्टारर फिल्म 'दृश्यम ३' (दृश्यम: द कन्क्लुजन)ले बक्स अफिसमा बलियो सुरूआत गरेको छ।
फिल्मले प्रदर्शनको दुई दिनमै विश्वव्यापी १७७ करोड भारू ग्रस कलेक्सन गरेको छ।
हिन्दुस्तान टाइम्सका अनुसार शुक्रबार र शनिबारको कमाइ जोड्दा फिल्मले भारतमा मात्रै ११५.५० करोड भारू नेट कमाएको छ। शुक्रबार फिल्मले भारतमा ६२ करोड भारू नेट कमाएको थियो भने शनिबार ५३.५० करोड भारू नेट थपेको हो। यससँगै दुई दिनमा फिल्मको घरेलु ग्रस कलेक्सन १३८.६० करोड रूपैयाँ पुगेको छ।
व्यापारसम्बन्धी स्रोतलाई उद्धृत गर्दै हिन्दुस्तान टाइम्सले फिल्मले हालसम्म अन्तर्राष्ट्रिय बजारबाट करिब ४ मिलियन अमेरिकी डलर कमाएको जनाएको छ। यही कमाइ जोड्दा फिल्मको विश्वव्यापी ग्रस कलेक्सन १७७ करोड भारू पुगेको हो।
फिल्मको पहिलो दिनको विश्वव्यापी कमाइ ९३ करोड भारू थियो। दोस्रो दिन केही सुस्त भए पनि फिल्मले बलियो व्यापारलाई निरन्तरता दिएको छ। यससँगै 'दृश्यम ३' यस वर्ष सर्वाधिक कमाउने हिन्दी फिल्मको सूचीमा माथि उक्लिरहेको छ।
रोचक कुरा के छ भने ‘दृश्यम ३’ले आफ्नो पहिलो भाग 'दृश्यम'को लाइफटाइम कलेक्सनलाई समेत केवल दुई दिनमै उछिनेको छ। सन् २०१५ मा रिलिज भएको पहिलो 'दृश्यम'ले प्रदर्शन अवधिभर भारतमा करिब ९३ करोड भारू ग्रस र विश्वभर करिब १३६ करोड भारू कमाएको थियो।
त्यस्तै, ‘दृश्यम ३’ले सलमान खानको ‘सिकन्दर’को १७६ करोड भारूको लाइफटाइम कलेक्सनलाई समेत पछाडि पारेको छ।
फिल्मको अग्रिम बुकिङले नै यसको बलियो सुरूआतको संकेत दिएको थियो। 'दृश्यम ३' हिन्दी फिल्ममध्ये पहिलो दिनको अग्रिम बुकिङबाट सर्वाधिक कमाउने फिल्मको सूचीमा चौथो स्थानमा थियो। प्रदर्शनको दिनसम्म यसको अग्रिम बुकिङ ५० करोड भारूभन्दा बढी पुगेको थियो।
अभिषेक पाठक निर्देशित ‘दृश्यम ३’मा अजय देवगनसँगै तब्बु, श्रिया सरन, जयदीप अहलावत, इशिता दत्ता, रजत कपुर, प्रकाश राज, मृणाल जाधवलगायत कलाकारको अभिनय छ।
'दृश्यम ३' अक्टोबर २ देखि विश्वव्यापी प्रदर्शनमा आएको हो। फिल्म नेपालमा पनि भारतसँगै एकसाथ रिलिज भएको हो। नेपालमा समेत फिल्मले राम्रो सुरूआत गरेको छ।
