बलिउड अभिनेता सलमान खान अभिनीत फिल्म 'मातृभूमि'ले भारतको सेन्सर बोर्डबाट प्रदर्शन अनुमति पाएको छ।
फिल्मले केन्द्रीय फिल्म प्रमाणन बोर्ड (सीबीएफसी) बाट यूए १६ प्लस प्रमाणपत्र प्राप्त गरेको हो। यसको अर्थ १६ वर्षमुनिका दर्शकले अभिभावकको साथमा फिल्म हेर्न पाउनेछन्।
भारतीय मनोरञ्जन पोर्टल 'बलिउड हंगामा'का अनुसार फिल्मले नोभेम्बर १८ (बुधबार)मा सेन्सर प्रमाणपत्र पाएको हो। फिल्मको रनटाइम २ घण्टा ३४ मिनेट १२ सेकेन्ड छ।
यो फिल्मको नाम सुरूमा 'ब्याटल अफ गलवान' राखिएकोमा यसै वर्ष परिवर्तन गरेर 'मातृभूमि: मे वार रेस्ट इन पिस' राखिएको थियो।
भारत र चीनबीच सन् २०२० मा गलवान उपत्यकामा भएको सैन्य झडपको पृष्ठभूमिमा आधारित फिल्मले विषयवस्तु र चीनसँग सम्बन्धित सन्दर्भका कारण विभिन्न अवरोध सामना गर्नुपरेको थियो।
तर, फिल्मको ट्रेलर सार्वजनिक कार्यक्रममा सलमानले यसको कथावस्तु चीनविरोधी नरहेको स्पष्ट पारेका थिए। उनले फिल्ममा दुवै देशका सैनिक र उनीहरूका परिवारले भोग्ने परिस्थिति देखाइएको बताएका थिए।
अपूर्व लाखिया निर्देशित 'मातृभूमि'मा सलमानसँगै चित्रांगदा सिंह शीर्ष भूमिकामा छिन्।
'मातृभूमि' नेपाली अभिनेता अनुपविक्रम शाहीको बलिउड डेब्यू हो। उनले चिनियाँ सेनाका मेजरको भूमिका निर्वाह गरेका छन्।
फिल्मको सार्वजनिक ट्रेलरमा अनुप र सलमान पटकपटक आमनेसामने देखिएका छन्। उनीहरूबीचका दृश्यले पनि दर्शकको ध्यान खिचेको छ।
अनुपले फिल्ममा आफ्नो अधिकांश दृश्य सलमानसँगै रहेको खुलाएका छन्। 'सलमान सर र मेरो एउटा मात्रै होइन, धेरै फाइट सिन छन्। मेरो जति पनि सिन छ, त्यसमा ८० प्रतिशत सिन सलमान सरसँगै छ,' उनले भनेका छन्।
यसैगरी, फिल्ममा गायक तथा अभिनेता प्रशान्त तामाङको पनि अभिनय छ। यसअघि नै निधन भइसकेका प्रशान्तको यो अन्तिम फिल्म हो।
अनुपविक्रम र प्रशान्तको अभिनय रहेका कारण पनि 'मातृभूमि' नेपाली दर्शकमाझ समेत थप चासोको विषय बनेको छ।
सलमान खान फिल्म्सको निर्माणमा बनेको 'मातृभूमि' डिसेम्बर ४ (मंसिर १८)देखि विश्वव्यापी प्रदर्शनमा आउँदैछ।