संगीत क्षेत्रमा सक्रिय रहँदै पढाइलाई पनि निरन्तरता दिँदै आएकी गायिका रचना रिमालले स्नातक तह (बिए) उत्तीर्ण गरेकी छन्।
उनले संगीत र राजनीतिशास्त्र विषयमा बिएको चारवर्षे अध्ययन पूरा गरेकी हुन्।
'पढाइलाई बीचमै नछोड्ने, जति व्यस्त भए पनि आफ्नो अध्ययन पूरा गर्ने अठोट गरेकी थिएँ। त्यो अठोटलाई अन्ततः पूरा गर्न सफल भएकी छु,' रचनाले सामाजिक सञ्जालमा लेखेकी छन्। उनी रत्न राज्यलक्ष्मी क्याम्पसबाट बिए उत्तिर्ण भएकी हुन्।
बिए उत्तीर्ण हुनु आफ्नो लागि केवल शैक्षिक उपलब्धि मात्र नभएको रचनाको भनाइ छ। यसले आफ्नो सपना र जिम्मेवारीलाई सँगसँगै अघि बढाउन सकिन्छ भन्ने विश्वास थप बलियो बनाएको उनले बताएकी छन्।
उनले लेखेकी छन्, 'आज मैले संगीत र राजनीतिशास्त्रमा स्नातक तहका चारै वर्ष सफलतापूर्वक उत्तीर्ण गरेकी छु। यो मेरो लागि केवल एउटा शैक्षिक उपलब्धि मात्र होइन, आफ्नो सपना र जिम्मेवारीलाई सँगसँगै अघि बढाउन सकिन्छ भन्ने विश्वासको एउटा सुन्दर परिणाम पनि हो।'
उनले आगामी दिनमा पनि संगीतकर्मसँगै पढाइलाई निरन्तरता दिने बताएकी छन्। रचना पछिल्लो पुस्ताकी लोकप्रिय गायिका हुन्।
