सामान्यतया बजारमा ५, १०, २०, ५०, १००, ५०० र एक हजार रूपैयाँका नोट बढी चलनचल्तीमा देखिन्छन्।
तर, बजारमा यी बाहेक अन्य ५ वटा दरका नोट पनि छन्।
नेपाल राष्ट्र बैंकका अनुसार २०८३ असार मसान्तसम्म बजारमा विभिन्न ११ दरका नेपाली नोट चलनचल्तीमा छन्।
ती नोटको कुल मूल्य ८ खर्ब ७ अर्ब ६९ करोड रूपैयाँ छ।
बजारमा ३ अर्ब ५६ करोड २ लाख ५१ हजार ३५२ थान नोट रहेका छन्।
बजारमा सबैभन्दा धेरै संख्यामा पाँच रूपैयाँका नोट छन्।
यस्ता नोट ७९ करोड ४६ लाख ८० हजार २८४ थान छन्।
तर, कुल रकमका आधारमा भने एक हजार रूपैयाँका नोटको हिस्सा सबैभन्दा ठूलो छ।
राष्ट्र बैंकका अनुसार बजारमा एक हजार रूपैयाँ दरका ५५ करोड ४६ लाख ५४ हजार ६१४ थान नोट छन्।
यी नोटको कुल मूल्य ५ खर्ब ५४ अर्ब ६५ करोड ४६ लाख १४ हजार रूपैयाँ हुन्छ।
यो बजारमा रहेका कुल नोटको मूल्यको करिब ६८.७ प्रतिशत हो।
त्यस्तै, १० रूपैयाँका ५९ करोड ५४ लाख ६८ हजार ८६ थान नोट चलनचल्तीमा छन्।
५०० रूपैयाँका ३७ करोड ६३ लाख २४ हजार २५३ थान र १०० रूपैयाँका ३३ करोड ६८ लाख ३९ हजार ९७१ थान नोट छन्।
बजारमा २० रूपैयाँका ३८ करोड ४५ लाख ८७ हजार ५४ थान र ५० रूपैयाँका २६ करोड १५ लाख ७९ हजार ९९६ थान नोट छन्।
सानो दरका एक र दुई रूपैयाँका नोट पनि चलनचल्तीमा छन्।
राष्ट्र बैंकका अनुसार एक रूपैयाँका १६ करोड ९ लाख ६४ हजार ८६० थान र दुई रूपैयाँका ९ करोड २५ लाख २२ हजार १९० थान नोट छन्।
त्यस्तै, बजारमा २५ रूपैयाँका २२ लाख ८० हजार ३६० थान र २५० रूपैयाँका ३ लाख ४९ हजार ६८४ थान नोट पनि चलनचल्तीमा छन्।
यसरी बजारमा सबैभन्दा धेरै संख्यामा पाँच रूपैयाँका नोट भए पनि कुल रकमका आधारमा एक हजार रूपैयाँका नोटको हिस्सा सबैभन्दा धेरै छ।