विनाशकारी बाढी र पहिरोबाट प्रभावित क्षेत्रका नागरिकलाई डिसहोमले आफ्ना इन्टरनेट ग्राहकहरूलाई १५ दिनको थप निःशुल्क सेवा उपलब्ध गराउने घोषणा गरेको छ।
प्राकृतिक विपद्का कारण दैनिक जनजीवन कष्टकर बनिरहेका बेला आपत्कालीन समन्वय र सूचना आदानप्रदानमा इन्टरनेटको महत्त्वपूर्ण भूमिका हुने भएकाले प्रभावित क्षेत्रमा सो सेवा निःशुल्क गरिएको कम्पनीले जारी गरेको प्रेस विज्ञप्तिमा उल्लेख छ।
डिसहोमका अनुसार त्रिशूली, त्रिशूली बट्टार, गल्छी, आदमघाट र मलेखु क्षेत्रका डिसहोम इन्टरनेट ग्राहकहरूले यो सुविधा प्राप्त गर्नेछन्।
विपद्को कठिन समयमा ग्राहक तथा प्रभावित समुदायको साथमा उभिएर सेवा निरन्तरता र सूचना पहुँचमा सहजता प्रदान गर्नु आफ्नो सामाजिक उत्तरदायित्वको महत्त्वपूर्ण हिस्सा भएको डिस होमले बताएको छ।
साथै, कम्पनीले आफ्ना प्रभावित ग्राहकहरूलाई यस विषम परिस्थितिमा धैर्यधारण गर्न आग्रह गर्दै कुनै प्राविधिक सहयोग आवश्यक परेमा सम्बन्धित सेवा केन्द्र वा आधिकारिक ग्राहक सेवा माध्यममा सम्पर्क गर्न अनुरोध गरेको छ।
