रसुवागढी जलविद्युत् आयोजनाको सुरूङभित्र करिब २५० मिटर पुगेपछि अगाडिको भाग माटो–ढुंगाले पूर्ण रूपमा थुनिएको भेटिएपछि उद्धार टोली फर्किएको छ।
नेपाली सेनाको उद्धार टोली र ड्रोन अपरेटर सहितको टोली सुरूङभित्र प्रवेश गरेको थियो।
टोली करिब २०० देखि २५० मिटरभित्र पुगेपछि सुरूङ माथिसम्मै माटो–ढुंगाले बन्द भएको देखिएपछि फर्किएकाे आयोजनाका इञ्जिनियर साङ्गे लामाले बताए।
‘हामी करिब २०० देखि २५० मिटरभित्र छिरिसकेपछि सुरूङ पूर्ण रूपमा ब्लक भएको देखियो। त्यसपछि हामी त्यसै फर्किएका हौं,’ लामाले भने।
उनका अनुसार सुरूङभित्र करिब तीन मिटर गहिराइसम्म माटो–ढुंगाको थुप्रिएर थुनिएकाे छ। उक्त थुनिएकाे ठाउँ खुलाउन मिनी एक्स्काभेटर लगायतका उपकरण सुरूङभित्रै लैजानुपर्ने छ।
अवरूद्ध क्षेत्र जोखिमपूर्ण रहेकाले उपकरण लैजान र माटो–ढुंगा हटाएर अघि बढ्न समय लाग्ने भएकाले उद्धार टोली फर्किएकाे उनकाे भनाइ छ।
आयोजनाले पावर हाउसतर्फको टनेलमा १४ जनाको फसेको बताउँदै आएको छ।
आयाेजनाका अनुसार बाढीका बेला आयाेजनामा ९८ जना कार्यरत रहेकामा हाल ९२ जना सम्पर्कविहीन छन्। कार्यरतमध्ये ५० जना कम्पनीका कर्मचारी हुन् भने ४२ जना ठेकेदार कम्पनीका र ६ जना दैनिक ज्यालादारी कर्मचारी हुन्।
यहाँ ज्यालादारी कर्मचारी ६ जनामध्ये ४ जनाको जीवितै उद्धार गरिएको छ भने २ जनाको शव फेला परेको छ।
-1788175139.png)
