भेगास सिटी इन्टरनेसनल प्रालिले विपद् प्रभावितहरूका लागि २६ लाख रूपैयाँ सहयोग गरेको छ।
भेगास सिटी इन्टरनेसनलका सञ्चालक बलराम सापकोटाले उक्त सहयोग रकम पर्यटनमन्त्री गणेश पौडेललाई हस्तान्तरण गरेका हुन्।
विपदका कारण प्रभावित भएका नागरिकलाई राहत तथा सहयोग पुर्याउने उद्देश्यले संस्थाले उक्त रकम उपलब्ध गराएको हो।
सहयोग रकम हस्तान्तरण गर्दै सञ्चालक सापकोटाले आपत तथा विपदका बेला नेपाल र नेपाली नागरिकको साथमा उभिनु आफ्नो सामाजिक दायित्व र कर्तव्य भएको बताए।
उनले विपदका कारण समस्यामा परेका नागरिकलाई तत्काल राहत तथा आवश्यक सहयोग उपलब्ध गराउन सबै क्षेत्रबाट सहकार्य र सहयोग आवश्यक रहेको उल्लेख गरे।
भेगास सिटी इन्टरनेसनलले आगामी दिनमा पनि सामाजिक उत्तरदायित्वअन्तर्गत आवश्यक सहयोग र सहकार्यलाई निरन्तरता दिने जनाएको छ।
भेगास सिटी इन्टरनेसनलले झापामा होटल मेची क्राउन सञ्चालन गर्दै आइरहेको छ।
