नेपाल जर्मन उद्योग वाणिज्य संघले होटलमा १८४ वटा एलपी ग्यास सिलिन्डर रहेको विषयलाई अस्वाभाविक, लुकाइएको वा अतिरिक्त भण्डारणका रूपमा प्रस्तुत गर्नु तथ्यपरक नभएको जनाएको छ।
संघका महासचिव एलेक्स लाल मुक्तानद्वारा जारी विज्ञप्तिमा ग्यास सिलिन्डरको सुरक्षित भण्डारण, ह्यान्डलिङ तथा प्रयोगमा लागू हुने सरकारी नियम, सुरक्षा मापदण्ड तथा सम्बन्धित कानुनी प्रावधानहरूको पालना गर्न होटल प्रतिबद्ध रहेको उल्लेख गरिएको छ।
विज्ञप्तिमा होटलको वास्तविक आकार, सञ्चालनको प्रकृति, भान्सा तथा रेस्टुरेन्ट तथा आउटलेटको संख्या, दैनिक खाना उत्पादन, भोज तथा कार्यक्रम गतिविधि, विमानस्थलस्थित सेवा र दैनिक ग्यास खपतलगायत सम्पूर्ण सञ्चालनगत पक्षलाई समग्र रूपमा मूल्याङ्कन गरेर मात्र यस विषयमा निष्कर्ष निकाल्नुपर्ने जनाइएको छ।
विशेषगरी दुई दिनभन्दा कम समयको सञ्चालनका लागि आवश्यक ग्यासको परिमाणलाई समेत अतिरञ्जित रूपमा प्रस्तुत गरी प्रचारको विषय बनाइनु दुःखद् भएको संघले जनाएको छ।
यस्ता अपूर्ण वा एकपक्षीय सूचनाले अन्तर्राष्ट्रिय होटल ब्रान्डको प्रतिष्ठामा अनावश्यक असर पार्न सक्ने तथा समग्र नेपाली पर्यटन तथा आतिथ्य क्षेत्रप्रति समेत नकारात्मक सन्देश प्रवाह हुन सक्ने संघको भनाइ छ।
नेपालमा पर्यटन, होटल तथा आतिथ्य क्षेत्र रोजगारी सिर्जना, विदेशी मुद्रा आर्जन र आर्थिक गतिविधिको महत्वपूर्ण आधारका रूपमा स्थापित हुँदै गएको भन्दै संघले यस्ता विषयलाई तथ्य, वास्तविक सञ्चालनगत आवश्यकता र सम्बन्धित व्यवसायीसँगको संवादका आधारमा निष्पक्ष रूपमा हेर्न आवश्यक रहेको जनाएको छ।
नेपाल जर्मन उद्योग वाणिज्य संघले होटलमा रहेका १८४ वटा एलपी ग्यास सिलिन्डर कुनै पनि हिसाबले लुकाएर वा गैरकानुनी रूपमा अतिरिक्त परिमाणमा भण्डारण नगरिएको स्पष्ट पारेको छ।
ती होटलको वास्तविक सञ्चालन आवश्यकता, दैनिक खपत, सिलिन्डरको रोटेसन तथा भान्साको निरन्तर सञ्चालन सुनिश्चित गर्न व्यवस्थापन गरिएका सिलिन्डर भएको संघले जनाएको छ।
अन्तर्राष्ट्रिय ब्रान्डसँग आबद्ध होटल तथा नेपालको पर्यटन उद्योगमा योगदान पुर्याइरहेका व्यवसायीहरूको प्रतिष्ठामा असर पर्ने विषयमा तथ्यको पूर्ण सत्यापन, सन्तुलित सूचना सम्प्रेषण र जिम्मेवार पत्रकारिता आवश्यक रहेको संघले जनाएको छ।
संघले सम्बन्धित सबै निकाय तथा सञ्चारमाध्यमलाई होटल तथा पर्यटन व्यवसायसँग सम्बन्धित विषयमा तथ्यपरक, निष्पक्ष र जिम्मेवार सूचना सम्प्रेषण गर्न आग्रह गरेको छ।
साथै, होटल तथा पर्यटन व्यवसायलाई अनावश्यक रूपमा हतोत्साहित नगरी सुरक्षा, नियमन र व्यावसायिक सञ्चालनबीच सन्तुलित, व्यावहारिक र लगानीमैत्री दृष्टिकोण अपनाउन सम्बन्धित निकायको ध्यानाकर्षण गराएको छ।
-1746009348.jpg)
