रसुवाको टिमुरे क्षेत्र तथा त्रिशूली नदी आसपासमा बुधबार बिहान भएको हेलिकोप्टर दुर्घटनाप्रति एयरलाइन्स अपरेटर्स एसोसिएसन अफ नेपालका पूर्वअध्यक्ष क्याप्टेन रामेश्वर थापाले गहिरो दुःख व्यक्त गरेका छन्।
थापाले दुर्घटनामा ज्यान गुमाएका नागरिकप्रति श्रद्धाञ्जली अर्पण गर्दै शोकसन्तप्त परिवारजनप्रति हार्दिक समवेदना व्यक्त गरेका छन्। साथै उद्धार तथा राहत कार्यमा खटिएका सम्पूर्ण पाइलट, चालक दल, व्यवस्थापन, हेलिकोप्टर अपरेटर तथा सम्बन्धित व्यक्ति र निकायप्रति सम्मान व्यक्त गरेका छन्।
नेपालमा विपद् वा संकट पर्दा हेलिकोप्टर उड्डयन क्षेत्रले समुदायको सेवामा अग्रपंक्तिमा रहेर काम गर्दै आएको उल्लेख गर्दै उनले दुर्गम भूगोल, कठिन मौसम र चुनौतीपूर्ण परिस्थितिमा पनि जीवन बचाउन तत्काल पुग्नु नेपाली उड्डयन क्षेत्रको लामो समयदेखिको परम्परा भएको बताएका छन्।
उनले अहिलेको परिस्थितिमा सम्पूर्ण हेलिकोप्टर अपरेटर, क्याप्टेन तथा चालक दललाई उद्धार कार्यलाई उच्च प्राथमिकताका साथ निरन्तरता दिन आग्रह गरेका छन्। संकटमा परेका नागरिकको जीवन बचाउन सानो प्रयासले पनि ठूलो योगदान पुर्याउन सक्ने उनको भनाइ छ।
उद्धार कार्य प्रभावकारी र दिगो बनाउन उडान सुरक्षाको उच्चतम मापदण्ड कायम गर्नुपर्नेमा जोड दिँदै थापाले कठिन भूगोल र परिस्थितिमा हुने उद्धार उडानमा जोखिमको निरन्तर मूल्यांकन, मौसम तथा स्थल अवस्थाको सही विश्लेषण, उचित समन्वय र स्थापित उडान सुरक्षा प्रक्रियाको पूर्ण पालना गर्न आग्रह गरेका छन्।
‘जहाँ आवश्यकता छ, त्यहाँ पुगौँ, जहाँ जीवन बचाउन सकिन्छ, त्यहाँ आफ्नो अधिकतम क्षमता प्रयोग गरौँ’ भन्ने आह्वान गर्दै उनले प्रत्येक उद्धार उडान व्यावसायिक विवेक, अनुभव र उच्चतम सुरक्षा मापदण्डका साथ सञ्चालन गर्न आग्रह गरेका छन्।
थापाले अहिलेको आवश्यकता आपसी सहयोग, समन्वय र मानवीय सेवाको भावना भएको बताएका छन्।
नेपाली उड्डयन क्षेत्रले विगतमा जस्तै कठिन समयमा पनि सेवा भावना, साहस र व्यावसायिक जिम्मेवारी प्रदर्शन गर्ने विश्वास व्यक्त गर्दै उनले नियामक निकाय नेपाल नागरिक उड्डयन प्राधिकरण तथा सम्बन्धित निकायलाई आवश्यक सहजीकरणका लागि आग्रह गरेका छन्।
-1787736824.jpeg)
