दुसित थानी हिमालयन रिसोर्ट धुलिखेलले पहिलो पटक 'केक मिक्सिङ समारोह' गरेर क्रिसमस र नयाँ वर्षको सुरुआत गरेको छ।
रिसोर्टले आइतबार गरेको समारोहमा कर्पोरेट तथा ट्राभल क्षेत्रका प्रतिनिधि, पर्यटन संघसंस्थाका पदाधिकारी, सञ्चारकर्मी र विभिन्न क्षेत्रका व्यक्तिहरू सहभागी थिए।
कार्यक्रममा पाहुनाहरूले रिसोर्टको पाक टोलीसँग मिलेर ड्राइ फलफूल, नट र अन्य विशेष सामग्री मिसाए।
क्रिसमसअघि गरिने केक मिक्सिङलाई समृद्धि, प्रचुरता र बाँडेर खाने भावनाको प्रतीक मानिन्छ।
यसरी मिसाइएको सामग्रीबाट क्रिसमसको विशेष केक बनाइन्छ।
समारोहमा रिसोर्टका कर्मचारीहरू पनि सामूहिक रूपमा सहभागी भए।
दुसितले यसलाई आफ्नो आतिथ्यको न्यानोपन र टिम भावनाको प्रतीक मानेको छ।
दुसितको पहिचान मानिने वेलनेस सेवालाई पनि कार्यक्रममा समेटिएको थियो।
पाहुनाहरूले रिसोर्टका आरामदायी वेलनेस थेरापीको अनुभव लिए।
रिसोर्टले यसलाई समग्र सुस्वास्थ्यप्रतिको आफ्नो प्रतिबद्धताको झलक भनेको छ।
दुसित थानी हिमालयन रिसोर्ट धुलिखेलका महाप्रबन्धक अंकित शर्माले पहिलो केक मिक्सिङ समारोह साझेदार र पाहुनाहरूसँग मनाउन पाउँदा खुसी लागेको बताए।
'चाडपर्वको रमाइलोभन्दा पनि यो भेटघाट अर्थपूर्ण सम्बन्ध बनाउने र मानिसहरूलाई एकै ठाउँमा ल्याउने अवसर हो,' उनले भने, 'हामी यसलाई वार्षिक क्यालेन्डर नै बनाएर अघि बड्छौँ। पाहुना र साझेदारहरूले हरेक वर्ष यसको प्रतीक्षा गरून् भन्ने हाम्रो चाहना छ।'
थाइल्यान्डको आतिथ्य समूह दुसित इन्टरनेसनलसँग आबद्ध यो रिसोर्ट काठमाडौंबाट करिब ३० किलोमिटर पूर्वमा पर्ने धुलिखेलमा छ।
हिमाली दृश्य, सूर्योदय र शान्त वातावरणका लागि चिनिने धुलिखेल सप्ताहान्त घुम्न, परिवारसँग बिदा मनाउन र कर्पोरेट कार्यक्रम गर्न रुचाइने गन्तव्य हो।