राष्ट्रिय स्वतन्त्र पार्टी (रास्वपा) लुम्बिनी प्रदेश समितिले केन्द्रदेखि वडा तहसम्मै पार्टी पुनर्गठनको माग गरेको छ।
लुम्बिनी प्रदेशका महामन्त्री नीलराज अधिकारीले केन्द्रीय महामन्त्री कविन्द्र बुर्लाकोटीलाई असोज ४ गते बसेको बैठकको निर्णयको जानकारी गराउँदै पार्टी पुनर्गठनको सुझाव पठाएका हुन्।
‘पार्टीको केन्द्रीय समितिको विस्तारित बैठक अविलम्ब गर्न अनुरोध गर्दछौं। बैठकले केन्द्रीय समिति पूर्ण रूपमा रिफर्म गर्ने अधिकार प्राप्त गर्नुपर्छ भन्नेमा हामी स्पष्ट छौं। केन्द्रदेखि वडा समितिसम्म पूर्णरूपमा पुनर्गठन गर्दै अब निर्वाचनको तयारीमा जुट्नुपर्दछ भन्ने हाम्रो मत रहेको छ,’ सुझावमा उल्लेख गरिएको छ।
लुम्बिनी प्रदेशले आगामी निर्वाचनको लागि उम्मेदवार छनौटको कार्यविधि शंसोधन गर्न माग गरेको छ। कार्यविधि संशोधन गरी जिल्ला सभापति सहितलाई उम्मेदवार छनौटको अधिकार दिनुपर्ने पनि ध्यानाकर्षण गराइएको छ।
‘हस्ताक्षर अभियानको क्रममा उठेको भनिएको सहयोगको पारदर्शीताको लागि हामी जोडदार माग गर्दछौं,’ उनले भने।
यस्तै लुम्बिनी प्रदेशले संघीयता, गणतन्त्र, धर्मनिरपेक्षता जनमत संग्रह गराउन माग गरेको छ।
‘संघीयता, गणतन्त्र, धर्मनिरपेक्षता जस्ता विषयमा जनताको अभिमतबाट टुंगो लगाउनुपर्छ भन्नेमा पार्टी उभिनुपर्छ भन्ने हाम्रो मत रहेको छ,’ उनले भने।
त्यस्तै जेनजीको आह्वानमा गत भदौ २३ र २४ गते सम्पन्न प्रदर्शनको क्रममा हिंसात्मक गतिविधीमा संलग्न भएको आरोपमा तल्लो तहका साथीहरू मात्र निशानामा परेको पनि रास्वपा लुम्बिनीले बताएको छ।
‘जेनजीको आह्वानमा गत भदौ २३ र २४ गते सम्पन्न प्रदर्शनको क्रममा हिंसात्मक गतिविधीमा संलग्न भएको आरोपमा तल्लो तहका साथीहरू मात्र निशानामा परेकामा हामी गम्भिर भएका छौं। पहिलो कुरा त आन्दोलनमा सक्रिय सहभागी बन्न आग्रह गर्दै अपिल गर्ने पार्टी नेतृत्वले घटनालाई उत्तेजित बनाउन भूमिका खेलेकाहरुलाई कारवाही गर्ने हो भने कारबाही र अनुसन्धानको सुई माथिबाट तल चलाउनुपर्छ भन्ने कुरामा लुम्विनी प्रदेश समिति एकमत रहेको छ। साथै आन्तरिक छानबिन समिति बनाएर आन्तरिक रूपमै निलम्बन वा कारबाही के गर्ने हो जसको अध्ययनको लागि ३ दिनको समय दिनेगरी छानबिन समिति बनाउन र छानबिन समितिको प्रतिवेदनको आधारमा दोषी देखिएमा दोषीहरू जति सबैलाई तत्काल कारवाही गर्न हामी जोडदार माग गर्दछौं,’ रास्वपा लुम्बिनीले भनेको छ।
-1746009348.jpg)
