निर्वाचन आयोगले दलहरूले समानुपातिकतर्फ बुझाएका सबै दलको बन्द सूचीमा केही न केही गल्ती भेटेको छ।
आयोगको समानुपातिक तर्फको निर्वाचन अधिकृतको कार्यलयका अनुसार बन्दसूची बुझाएका ५८ वटै दलको सूचीमा केही न केही गल्ती भेटिएको छ। गल्ती सच्याउन आयोगले सबै दलहरूलाई इमेल गरेको छ।
फागुन २१ गते हुने प्रतिनिधि सभाको निर्वाचनका लगि ५४ वटा एक्लाएक्लै र दश वटा दल ४ वटा चुनाव चिन्ह लिएर प्रतिस्पर्धामा छन्।
‘केहीको हस्ताक्षर छुटेको छ। धेरैको सूचीमा नाम दोहोरो छ,’ कार्यालयका एक अधिकृतले सेतोपाटीसँग भने, ‘कांग्रेसको सूचीमा नाम दोहोरो भेटिएको छ। एमालेको सूचीमा पनि एउटा क्लष्टरमा हुनुपर्ने मान्छे अर्को क्लष्टरमा इन्ट्री गरेको पाइएको छ।’
आयोगका अनुसार केही दलहरूले २५ वर्ष उमेर नपुगेका व्यक्तिको नाम पनि सूचीमा समावेश गरेका छन्। संविधान अनुसार प्रतिनिधि सभाको उम्मेदवार बन्न २५ वर्ष उमेर पूरा भएको हुनुपर्छ। आयोगले विभिन्न दलबाट ५ जना यस्ता व्यक्तिको नाम भेटेको हो। उनीहरूको नाम हटाउन आयोगले इमेल लेखेको छ।
‘धेरै दलहरूले पिछडिएको क्षेत्र भनेर नाम राखेका व्यक्तिहरूको नागरिकता नै हेरेर रूजु गर्नुपर्ने भएको छ,’ आयोगका ती अधिकृतले भने, ‘पिछडिएका क्षेत्र भनेर तोकिएका ९ जिल्ला बाहेक अन्यन्त्र नागरिकता भएका व्यक्तिको रूजु गर्नुपर्ने हुन्छ।’
त्यस्तै केही दलहरूले अपांगता भएका तर्फको नाम नबुझाएकाले आयोगले उनीहरूलाई नाम बुझाउन भनेको छ। सर्वोच्च अदालतले पनि शुक्रबार आयोगलाई बन्दसूचीमा अपांगता भएका व्यक्तिहरूको नाम बुझाउने व्यवस्था गर्न आदेश दिएको थियो।
दलहरूले अब एक साता भित्र आयोगमा सूची सच्याएर बुझाउनुपर्ने हुन्छ। दलहरूले सूची सच्याएपछी आयोगले दाबी विरोधका लागि प्रकाशित गर्नेछ।
-1746009348.jpg)
