नेकपा एमालेका पूर्वउपाध्यक्ष सुरेन्द्र पाण्डे फागुन २१ गते हुने प्रतिनिधिसभा निर्वाचनमा प्रत्यक्ष तर्फको उम्मेदवारका लागि सिफारिसमा पनि परेनन्।
उनको निर्वाचन क्षेत्र चितवन–१ निर्वाचन क्षेत्र समन्वय कमिटीले उनलाई सिफारिस नगरेको हो। भर्खरै सकिएको महाधिवेशनमा महासचिव पदका लागि लडेर पराजित भएका पाण्डे आफ्नो क्षेत्रबाट उमेदवारी छनोटमा किन परेनन् भन्ने चासो बढेको छ।
आइतबार बसेको निर्वाचन क्षेत्र समन्वय कमिटीको बैठकले जिल्ला अध्यक्ष कमलराज पाठक, दावा दोर्जे लामा, कृष्णलाल चौधरी, किशोरचन्द्र खनाल, भरत भण्डारी, लक्ष्मी कोइराला पोखरेलको नाम सिफारिस भएको छ। उक्त सिफारिस माथिल्लो कमिटीमा पठाइने छ।
यसरी उम्मेदवार सिफारिस गर्दा चितवन–१ बाटै दुई पटक (२०७० र २०७४ सालमा) निर्वाचित भएका पूर्वअर्थमन्त्रीसमेत रहेका पाण्डे सूचीमा नपरेका हुन्।
गत महाधिवेशनमा महासचिवमा पराजित भएका पाण्डेले आफूसँग जिल्ला कमिटीले सम्पर्क नगरेको बताए। जिल्लाका जगन्नाथ थपलिया, दावा दोर्जे लामा, प्रेम दवाडी, प्रभा बराललगायत नेताहरूले भने सम्पर्क गरेको बताए।
‘उहाँहरूले के गरौं भन्नुहुन्थ्यो। मैले मिलाएर गर्नुहोस् भनेको थिएँ,’ पाण्डेले सेतोपाटीसँग भने, ‘निर्वाचन क्षेत्रीय समन्वय कमिटीका रहेका साथीहरूले आफै बुझ्ने कुरा हो। अध्यक्ष केपी शर्मा ओलीले झापा–५ मा मेरो नाम राखिदिनुस् भनेर पक्कै भन्नु भएन होला। उपाध्यक्ष विष्णु पौडेलले पनि रूपन्देही–२, ३ मा नाम सिफारिस गर्नुस् भन्नु भएन होला।’
गत निर्वाचनमा पनि पाण्डेको अन्तिम समयमा मात्रै टिकट टुंगो लागेको थियो। अघिल्लो पटक पाण्डे राष्ट्रिय स्वतन्त्र पार्टीका उम्मेदवार हरि ढकालसँग पराजित भएका थिए।
यसबारे हामीले जिल्ला अध्यक्ष कमलराज पाठकसँग पनि कुरा गर्यौं। उनले पार्टी जिल्लाका सदस्यहरूले पूर्वउपाध्यक्ष पाण्डेलाई सोधेको बताए। जबाफमा पाण्डेले इच्छा छैन भनेको पाठकले दाबी गरे।
‘हामीले हाम्रो क्षेत्रको पार्टीको वरिष्ठ नेतालाई नसोध्ने भन्ने कुरा नै आउँदैन। हामीले उहाँलाई सोध्यौं। बैठकबारे पनि जानकारी गरायौं। उहाँले अहिले नेपालगञ्ज छु, आउन पाउँदिन भन्नुभयो,’ पाठकले सेतोपाटीसँग भने, ‘त्यसपछि हामीले तपाईंको उम्मेदवार बन्ने आकांक्षा छ कि भनेर सोध्यौं। उहाँले इच्छा छैन, बढी भोट ल्याउन सक्ने साथीहरूको नाम पठाउँदा हुन्छ भन्नुभयो।’
अध्यक्ष पाठकले क्षेत्रीय समन्वय समितिबाट सिफारिस भएर आएका नामहरूबारे जिल्लामा छलफल हुने बताए। अहिले पनि पूर्वउपाध्यक्ष पाण्डेले उम्मेदवार सिफारिस होस् भनेको खण्डमा जिल्लालाई नाम समावेश गर्न समस्या नहुने बताए।
‘तलबाट एक प्रकारले नाम आएका छन्। हामी जिल्लामा ती नामहरूबारे छलफल गर्छौं। जिल्लाले नाम घटाउन पनि सक्छ, अरू नाम थपेर पनि माथिल्लो कमिटीमा पठाउन सक्छ,’ उनले भने।
-1746009348.jpg)
