नेपाली कांग्रेसका नेता कृष्णप्रसाद सिटौलाले आज काठमाडौंको जमलमा केही पत्रकारहरूसँग संवाद गरे।
पत्रकारहरूले विशेष महाधिवेशन, १५ औं महाधिवेशन र आगामी चुनावलगायत विभिन्न विषयमा सिटौलामाथि प्रश्न गरे।
जबाफमा सिटौलाले राष्ट्रिय सभामा अरू दलसँग कांग्रेसले तालमेल गर्नेबारे कार्यवाहक सभापति पूर्णबहादुर खड्का र केन्द्रीय सदस्य रमेश लेखकले कुराकानी गरिरहेको र आज बस्ने केन्द्रीय कार्यसम्पादन समिति बैठकबाट निर्णय गर्ने बताए।
उनले राष्ट्रिय सभामा रणनीतिक तालमेललाई गठबन्धन भन्न नहुने र प्रतिनिधि सभामा कांग्रेस एक्लै चुनाव लड्ने पनि बताए।
पत्रकारहरूले विशेष महाधिवेशनबारे सिटौलामाथि एकपछि अर्को प्रश्न गरेका थिए।
यहाँ हामीले प्रश्न र उत्तरलाई समावेश गरेका छौं;
पत्रकार- विशेष महाधिवेशन हुन लागेको हो?
सिटौला- हुँदैन, विशेष महाधिवेशन हुँदैन। केही विकल्पबारे मलाई थाहा छैन, विशेष महाधिवेशन हुँदैन मलाई यति चाहिँ थाहा छ।
पत्रकार- अप्ठ्यारो परेका बेला तपाईं थाहा छैन भन्नुहुन्छ
सिटौला- मुसुमुसु हाँसो मात्र
पत्रकार- ५४ प्रतिशतले माग गरेको विशेष महाधिवेशन टार्न पाइन्न भन्ने छ नि! कानुन व्यवसायीदेखि मिडिया र सामाजिक सञ्जालमा पनि
सिटौला- यो विषय अहिले पार्टीमा बहस छ। तर केन्द्रीय कार्यसम्पादन समितिले १५ औं महाधिवेशन गर्ने निर्णय गरेको छ। त्यो निर्णय हामी सबैले मान्नुपर्छ।
पत्रकार- कार्यसम्पादनमा महामन्त्रीहरूले नोट अफ डिसेन्ट लेख्नुभएको छ, त्यसले विशेष महाधिवेशनमा लैजान सक्छ कि सक्दैन?
सिटौला- पार्टीमा सर्वसम्मत र बहुमतबाट निर्णय गर्ने गरिन्छ। निर्णय गरेपछि महामन्त्रीहरूले कार्यान्वयन गर्नुपर्छ। कार्यसम्पादनको निर्णयलाई महामन्त्रीहरूले मान्नुहुन्छ। केन्द्रीय कार्यसम्पादन बैठक हुनुअघि महामन्त्रीहरूको एउटा वक्तव्यचाहिँ पाएँ- त्यसमा केन्द्रीय कार्यसमितिको सर्वसम्मतमा विशेष महाधिवेशन गरिनेछ भन्ने थियो। तर बहुमतले विशेष महाधिवेशनको औचित्य छैन, निर्वाचन तयारी गर्नुपर्छ भन्यो, त्यो निर्णय महामन्त्रीहरूले कार्यान्वयन गर्नुपर्छ।
पत्रकार- महामन्त्रीहरूको संयुक्त वक्तव्यको कार्यान्वयन कसले गरिदिने हो?
सिटौला- महामन्त्रीहरूले सर्वसम्मत विशेष महाधिवेशन अपेक्षा गर्नुभयो होला, भएन। बहुमतले विशेष महाधिवेशन गर्न पर्दैन भनेपछि मान्नुहोला नि त। उहाँहरूकै उपस्थितिमा वैशाखमा महाधिवेशन गर्ने निर्णय भएको छ। तर महामन्त्रीजीहरूले हामी फरक मत दर्ज गर्छौं भन्नुभएको थियो बैठकमै।
पत्रकार- विधानको धारा १७ को २ अनुसार विशेष महाधिवेशन माग गरेपछि महाधिवेशन प्रतिनिधि ठूलो कि केन्द्रीय समिति भन्ने छ नि! कुन ठूलो हो?
सिटौला- विधानको हरेक धाराको बैठक केन्द्रीय समिति वा केन्द्रीय कार्यसम्पादन समितिबाट हुन्छ। व्यक्तिको निर्णय त पार्टीको हुन्न नि। सभापतिजीले बैठक नभएका बेला बोले त्यो संस्थागत निर्णय हुँदैन नि।
पत्रकार- विशेष महाधिवेशन औचित्य छैन भनेको हो?
सिटौला- केन्द्रीय कार्यसम्पादनले भन्यो, अहिलेको परिस्थितिमा विशेष महाधिवेशनको औचित्य छैन। नियमित १५ औं महाधिवेशन कार्यतालिका आएपछि विशेष महाधिवेशन औचित्य समाप्त भएको थियो। पुसमा गर्ने महाधिवेशन कार्यतालिका संशोधन भएर वैशाखमा पुगेको छ। पुसमा महाधिवेशन नहुनुमा क्रियाशील सदस्यता नटुंगिएको हो। महामन्त्री गगन थापाकै नेतृत्वमा यो समिति छ। निर्वाचन तयारी नै अहिले प्राथमिक विषय हो।
पत्रकार- ७ भाइका कारण पार्टी यो विवादमा पर्यो भन्ने आरोप छ नि
सिटौला- पार्टीमा हामी सबै ठिक छौं। कार्यवाहक सभापति, हामी नेताहरू सबै ठिक छौं।
पत्रकार- महामन्त्रीहरू चाहिँ अलिअलि बेठिक हो?
सिटौला- उहाँहरू पनि ठिक हुनुहुन्छ। सब ठिक छ।
पत्रकार- तपाईं पनि कानुनी क्षेत्रमा काम गरेको मानिस, ठ्याक्कै भन्नुस्- ४० प्रतिशत माग गरे विशेष महाधिवेशन बोलाउन पर्छ कि पर्दैन?
सिटौला- त्यसको प्रक्रिया नै अघि बढेन। त्यो प्रस्तावलाई छलफलमा ल्याउने दायित्व कार्यवाहक सभापति र महामन्त्रीजीहरूकै हो, हाम्रो होइन। विशेष महाधिवेशन प्रक्रिया नै अघि बढेन। हस्ताक्षर आएका छन्, कतिले नियमितमा गरेको भन्छन् कतिले हस्ताक्षर गरेका होइनौं भन्छन्, विवाद त छ नि त। केन्द्रीय समितिमा यसबारे छलफलनै भएन। महामन्त्री गगन थापाले पनि पुस १६ को महाधिवेशन कार्यतालिका र कार्यवाहक सभापतिले पुस २६ को कार्यतालिका ल्याउनुभएको थियो। दुवै कार्यतालिका महाधिवेशनलक्षित थिएन, भएन। क्रियाशील नै टुंगो लागेको थिएन।
पत्रकार- महामन्त्रीले क्रियाशील समितिले फारम पठाउने हो भन्नुहुन्छ, क्षेत्रले क्रियाशील टुंग्याउने भन्नुहुन्छ। तपाईं सबै महामन्त्रीकै जिम्मेवारी भन्नुहुन्छ, बुझाइमा फरक पर्यो
सिटौला- केन्द्रीय सचिवालय नै महामन्त्री मातहत हुन्छ। त्यसको रेकर्ड राख्ने काम उहाँहरूको हो।
पत्रकार- केन्द्रीय सचिवालय महामन्त्री मातहत रहेकोले उहाँहरूले नै विशेष बोलाउन मिल्छ भन्ने छ नि!
सिटौला- हाँस्दै.. कहाँ कहाँ सोध्या
पत्रकार- विशेष महाधिवेशन उद्घाटन भृकुटीमण्डमा भयो भने के हुन्छ?
सिटौला- कहाँ विशेष महाधिवेशन हुन्छ, कति यही प्रश्न दोहोर्याएको। मैले भनेँ- विशेष महाधिवेशन हुँदैन। विधानबमोजिम पनि विशेष महाधिवेशन हुँदैन। केन्द्रीय समितिले स्थान र मिति तोक्नुपर्छ।
पत्रकार- भृकुटीमण्डपमा हुँदैछ त
सिटौला- भइहाल्यो अब, उहाँहरूलाई नै त्यसको औचित्य सोध्नुस्। मलाई चाहिँ पार्टी निर्णय र विधान चाहिँ सोध्नुस्।
पत्रकार- विशेष महाधिवेशन गर्नेलाई निकाल्ने वा निलम्बन गर्ने तयारी हो?
सिटौला- छैन छैन त्यस्तो। सभापतिजी र कार्यवाहक सभापतिजी उदार हुनुहुन्छ।
पत्रकार- वैशाखमा महाधिवेशन हुन्छ?
सिटौला- महाधिवेशन हुने गरी कार्यतालिका आएको छ भन्ने विश्वास छ। त्यसअनुसार तयारी गर्नुपर्छ। यो संशोधित कार्यतालिका हो र यसअनुसार महाधिवेशन गर्नुपर्छ।
पत्रकार- विशेष महाधिवेशन पक्ष र विपक्षमा बहस भइरहेको छ र यसले विभाजनमा लैजान्छ भन्ने छ। महामन्त्री गगन र विश्वप्रकाश दुवैलाई तपाईंले विगतमा उभ्याएको हो, हिजो गगनले पार्टी हाँक्छ देश हाँक्छ भनेर तपाईं भन्नुहुन्थ्यो र हामीले समाचार लेखेको पनि हो। तर आज तपाईं उहाँहरूसँग सहमत हुनुहुन्न, महामन्त्रीहरूको भूमिकाबारे के हो टिप्पणी?
सिटौला- हाँस्दै.. केही काम नपाएर त्यही सोध्नुहुन्छ। बैठक हुन लाग्यो जानु पनि छ।
पत्रकार- युवा युवा भन्नुहुन्थ्यो, युवाले चलाएको कस्तो लाग्यो भनेको हो
सिटौला- युवाहरूलाई त अघि बढाउन म सधैं सकारात्मक छु।
पत्रकार- पुस २८ गतेपछि कांग्रेस दुई चिरा हुन्छ?
सिटौला- हुँदैन। हामी हुन दिँदैनौं। उपाय भनेको यस्तै चलिरहन्छ।
पत्रकार- महामन्त्रीहरू अघि बढिसक्नुभयो
सिटौला- कांग्रेस पार्टी फुटोस् भन्ने कतिको चाहना होला। कांग्रेस कमजोर गर्ने चाहना होला। हामी त्यो चाहना पूरा हुन दिँदैनौं।
पत्रकार- भनेपछि विशेष महाधिवेशन हुने भयो
सिटौला- हुँदैन।
पत्रकार- नीति महाधिवेशन मात्रै गरौं भन्ने पनि चलेको रहेछ नि छलफल
सिटौला- मलाई थाहा छैन।
पत्रकार- कांग्रेसले प्रधानमन्त्री उम्मेदवार तोकेर चुनावमा जान्छ कि जाँदैन
सिटौला- जाँदैन। हाम्रो पद्धती छ, जितेर आउने साथीहरूको संसदीय दल बन्छ। जो दल नेता बन्छ- उही नै प्रधानमन्त्री हुन्छ।
पत्रकार- विशेष रोक्न गगन थापालाई प्रधानमन्त्री उम्मेदवार बनाउने चर्चा छ
सिटौला- कोसँग छलफल भयो? कार्यवाहक सभापतिजीलाई सोध्नु न। उहाँहरूबीच कुराकानी भएको भए।
पत्रकार- तपाईंले आफ्ना केही कुरा हामीलाई स्पष्ट भन्न बोलाउनुभएको कि नभन्न?
सिटौला- चिया खान बोलाएको। अघि मैले भनेँ त
पत्रकार- यति पत्रकार राखे पनि म जबाफ नदिई अलमल्याउन सक्छु भनेर हो कि
सिटौला- तमाम युवाहरूमाथि मलाई विश्वास छ, महामन्त्रीहरूमाथि मात्र होइन केन्द्रीय समितिमा रहेका सबै युवाहरूप्रति। धेरै युवाहरूले भरिएको पार्टी हो कांग्रेस। एक्लो कोही हिँड्न खोज्नु हुँदैन, पार्टी भनेको सामूहिक पद्दती व्यवस्था हो भन्ने मान्यता हो लोकतान्त्रिक व्यवस्थामा।
पत्रकार- वामपन्थीसँग गठबन्धन गरेर जाने हल्ला छ
सिटौला- राष्ट्रिय सभामा रणनीतिक तालमेल मात्र हो, आमनिर्वाचनमा कसैसँग कांग्रेसले गठबन्धन गर्दैन, सबै क्षेत्रमा उम्मेदवारी दिन्छ।
-1746009348.jpg)
