नेपाली कांग्रेसका ५ प्रदेश सभापतिहरूले विशेष महाधिवेशनको औचित्य समाप्त भइरहेको दाबी गर्दै संयुक्त वक्तव्य जारी गरेका छन्।
आज सानेपामा बसेको केन्द्रीय कार्यसम्पादन समिति बैठकमा आमन्त्रित रूपमा सहभागी भएका ७ प्रदेश सभापतिमध्ये ५ जनाले विशेष महाधिवेशनको औचित्य सकिएको भन्दै विज्ञप्ति निकालेका हुन्।
विज्ञप्ति निकाल्ने सबै प्रदेश सभापतिहरू शेरबहादुर देउवा पक्षका हुन्।
संयुक्त वक्तव्य सुदूरपश्चिम प्रदेश सभापति वीरबहादुर बलायरले केन्द्रीय कार्यालयअघि पढेर सुनाएका थिए।
कोशीका सभापति उद्धव थापा, मधेस सभापति कृष्णप्रसाद यादव, बागमती सभापति ईन्द्रबहादुर बानियाँ, कर्णाली सभापति ललितजंग शाही र सुदूरपश्चिम सभापति वीरबहादुर बलायरले विशेष महाधिवेशन औचित्य सकिएको भन्दै वक्तव्य जारी गरेका हुन्।
‘२०८३ वैशाख २८ देखि ३१ गतेसम्म नियमित महाधिवेशन सम्पन्न हुने भएकोले त्यसअघि विशेष महाधिवेशन गर्ने औचित्य समाप्त भएको अवस्थामा देशभरका सम्पूर्ण कांग्रेसजनलाई एकताबद्ध भई नियमित महाधिवेशन तयारी र आमनिर्वाचनमा पार्टीका उम्मेदवारहरूलाई विजयी गराउने कार्यमा जुट्न अपिल गर्दछौं,’ विज्ञप्तिमा भनिएको छ।
कांग्रेस विधानको धारा १७ को २ मा ४० प्रतिशत महाधिवेशन प्रतिनिधिले माग गरेमा ३ महिनाभित्र विशेष महाधिवेशन गर्नुपर्ने उल्लेख छ। तर नियमित महाधिवेशन कार्यतालिका आएका खण्डमा विशेष महाधिवेशन गर्नुपर्ने वा नपर्नेबारे विधानमा केही उल्लेख छैन।
महामन्त्रीद्वय गगन थापा र विश्वप्रकाश शर्माले पुस २८ भित्र विशेष महाधिवेशन हुनुपर्ने र त्यो विधानको बाध्यकारी व्यवस्था रहेको बताउँदै आएका छन्। कांग्रेसका ५४ प्रतिशत महाधिवेशन प्रतिनिधिहरूले असोज २९ गते विशेष महाधिवेशन माग गर्दै कार्यवाहक सभापति पूर्णबहादुर खड्कालाई हस्ताक्षर बुझाएका थिए।
-1746009348.jpg)
