कांग्रेस विशेष महाधिवेशन अन्तर्गत सोमबार बन्द सत्र सुरू हुँदैछ।
आइतबार उद्घाटन समारोह भएको भृकुटीमण्डपमै बन्द सत्र सुरू हुनेछ।
बन्द सत्रको औपचारिक कार्यक्रम बिहान १० बजेदेखि सुरू हुने विशेष महाधिवेशनको प्रचार प्रसार उपसमिति संयोजक सुवास पोखरेलले बताएका छन्।
प्रतिनिधिहरूलाई बिहान ८ बजेदेखि नै भृकुटीमण्डप आउन भनिएको छ। प्रतिनिधिको दर्ता गर्ने क्रम पनि जारी रहने र खाजाको समय पनि छुट्याइएका कारण १० बजेदेखि मात्रै बन्द सत्र सुरू हुनेछ।
बन्द सत्रको अध्यक्षता ज्येष्ठ सदस्यले गर्नेछन्।
कांग्रेस विशेष महाधिवेशन सचिवालय समन्वय समितिका संयोजक मनोजमणि आचार्यका अनुसार सबैभन्दा पहिला बन्दसत्रले विशेष महाधिवेशनका लागि बनाएको कार्यविधि पारित गर्ने कार्यक्रम रहेको छ ।
बन्दसत्रबाट कार्यविधि पारित भएसँगै सात प्रदेश, उपत्यका र भ्रातृ, शुभेच्छुक एवम् जनसम्पर्क समितिको छुट्टाछुट्टै ९ वटा समूह बनाएर नीति, नियम, विधान, राजनीतिक घटनाक्रमका बारेमा गहन छलफल गरिने संयोजक आचार्यले बताएका छन्।
छलफलपछि निष्कर्ष सुनाइनेछ।
बन्द सत्रको छलफलपछि नीति कि नेतृत्व परिवर्तन भन्ने निर्णय गर्नेछ।
विशेष महाधिवेशनमा सहभागी भएका प्रतिनिधिहरुमा पनि नेतृत्व परिवर्तनको विषयमा फरक-फरक मत छ।
केहीले विशेष महाधिवेशनबाट संकल्प प्रस्ताव मात्रै गर्नुपर्ने बताएका छन् भने केहीले नेतृत्व नै परिवर्तन गरेर जानुपर्ने बताएका छन्।
कांग्रेस महामन्त्री गगन थापाले हलबाट हुने निर्णय आफूलाई स्वीकार हुने बताइसकेका छन्।
-1746009348.jpg)
