नेकपा एमालेका महासचिव शंकर पोखरेलले नेपाली कांग्रेस महामन्त्री गगन थापालाई लक्ष्य गर्दै देश जलिरहेका बेला उत्सव मनाउन नसक्नेहरू कसैका लागि ‘दास’ जस्ता लाग्न सक्ने भन्दै टिप्पणी गरेका छन्। आइतबार विशेष महाधिवेशनको उद्घाटन सत्रमा मन्तव्य दिने क्रममा महामन्त्री थापाले कांग्रेस दास र लासहरूको पार्टी नभएको बताएका थिए।
त्यसप्रति प्रतिक्रिया व्यक्त गर्दै एमाले महासचिव पोखरेलले भूराजनीतिक स्वार्थका सामु लम्सार पर्नु दासता हो; त्यसका विरुद्ध आवाज उठाउनु स्वाभिमान भएको बताएका हुन्।
‘यसरी पनि सोच्न सकिन्छ— भूराजनीतिक स्वार्थका सामु लम्सार पर्नु दासता हो; त्यसका विरुद्ध आवाज उठाउनु स्वाभिमान हो। विध्वंश, अराजकता र आतंकका सामु झुक्नु कायरता हो; त्यसका विरुद्ध उभिएर जनताको मनोबल उठाउनु साहस हो। संविधान, लोकतन्त्र र राष्ट्रको भविष्य नै संकटमा परेको बेला, जन–जनको हृदय जलिरहेको घडीमा उत्सव कसरी मनाउन सकिन्छ र? हो, देश जलिरहेका बेला उत्सव मनाउन नसक्नेहरू कसैका लागि ‘दास’ जस्ता लाग्न सक्छन्,’ उनले भने।
ती भनिएका दासहरू नै आजको समयका स्पार्टाकस पनि हुन सक्ने पोखरेलले बताएका छन्।
‘ती स्पार्टाकस—जसले स्वतन्त्रता, स्वाधीनता र स्वाभिमानको झण्डा बोकेर आधुनिक विश्वव्यवस्थाको नयाँ आधारशिला निर्माण गर्नेछन्,’ उनले भनेका छन्।
-1746009348.jpg)
