नेकपा (एमाले) अछामका इञ्चार्ज भैरवबहादुर बोहराले पार्टी त्यागेको घोषणा गरेका छन्।
सोमबार उनले सार्वजनिक वक्तव्यमार्फत नेतृत्वप्रति विभिन्न दोषारोपन गर्दै एमाले परित्याग गरी नेपाली कम्युनिस्ट पार्टीमा पार्टी प्रवेश गरेको बताएका छन्। अछाम नेकपाका नेता डा. भीम रावलको गृह जिल्ला हो।
नेता रावत पूर्वएमाले नेता हुन्। पछिल्लो समय उनी नेकपामा पार्टी समायोजन गर्दै प्रवेश गरेका थिए।
सोमबार एमाले त्यागेर नेकपा रोजेका बोहरा एक जना अनुभवी र पुराना नेता हुन्। उनले वक्तव्यमा आफू विगत ४५ वर्षदेखि कम्युनिस्ट आन्दोलनमा रहेको उल्लेख गरेका छन्।
‘अहिले आएर राष्ट्रिय स्वाधिनता नै खतरामा पर्न थालेको र जनताका आकांक्षा धुमिल हुन लागेको जस्तो स्थिति सृजना भएको देख्दा देशभक्तिमा आधारित देश र जनमुखी बलियो कम्युनिस्ट पार्टीको आवश्यकता महसुस भएको छ,’ उनले भनेका छन्, ‘यस्तो आवश्यकतालाई पूरा गर्नेतर्फ काम गर्नुभन्दा म रहेको नेकपा (एमाले) को नेतृत्व सत्ता केन्द्रित, अहंकारी र स्वच्छाचारी भएर विपरीत सिद्धान्त र व्यवहार भएकाहरूसँग साँठगाँठ गर्ने तर्फ लागेको देखियो।’
बोहराले एमालेमा रहेर देश र जनताको देश हितमा योगदान गर्न नसकिने देखिएकोले सोमबारदेखि नै लागू हुने गरी एमाले त्यागेको उल्लेख गरेका छन्।
-1746009348.jpg)
