परराष्ट्रमन्त्री शिशिर खनालले बाढीमा हराइरहेकाहरूको खोजी तथा उद्धारका लागि सरकारले वैदेशिक सहायता अस्वीकार गरेको भन्ने चर्चाबारे जबाफ दिएका छन्।
शनिबार परराष्ट्र मन्त्रालयमा आयोजित प्रेस ब्रिफिङमा मन्त्री खनालले सरकारले त्यस्ता सहायता अस्वीकार नगरेको बरू विदेशी मुलुकबाट सहयोग प्राप्त भइहरेको बताएका हुन्।
उनले भारत, चीन, जापान, अस्ट्रेलियालगायतका मुलुकले सहयोगका लागि टोली तथा आवश्यक सामग्री पठाइरहेको जानकारी दिए।
'नेपालले अन्तर्राष्ट्रिय सहायता अस्वीकार गरेको भन्ने समाचारहरू गलत हुन्,' उनले भने।
उनले विपदले निम्त्याएको विनाशको स्तर निकै ठूलो रहेको र यसले नेपाललाई तत्कालका लागि उद्धार र राहतमा भन्दा दीर्घकालीन पुनर्निर्माण तथा पुनर्स्थापनामा अन्तर्राष्ट्रिय सहयोग आवश्यक पर्ने बताए।मन्त्री खनालले नेपालमा तत्काल खोज तथा उद्धारको नेतृत्व सुरक्षा निकायहरूले गरिरहेको बताए।
तर, सुरक्षा निकायको क्षमता र स्रोतभन्दा बाहिरका विशेष प्रकृतिका उद्धारमा भने नेपालले विदेशी साझेदारसँग सहयोग मागिरहेको उनको भनाइ छ।
'हाम्रा सुरक्षा निकायहरूले अहिले स्थलमा खोज तथा उद्धारका काम व्यवस्थापन गरिरहेका छन्। तर सुरुङ उद्धार, भग्नावशेषमुनि जीवित मानिस पत्ता लगाउने प्रविधि, छिटो फरेन्सिक तथा डिएनए परीक्षण र शव राख्नका लागि शवगृह जस्ता क्षेत्रमा सहयोगका लागि हामीले हाम्रा मित्रराष्ट्र तथा साझेदारसँग विशेष रूपमा अनुरोध गरेका छौं,' मन्त्री खनालले भने।
उनले भारत, चीन, जापान, अस्ट्रेलियालगायतका देशले सहयोगका लागि पहल गरिसकेको र केही सहयोग नेपाल आइसकेको बताए।
उनले बाढी तथा विपदबाट सडक, पुल, जलविद्युत् लगायतका पूर्वाधारमा भएको क्षति ठूलो रहेकाले पुनर्निर्माण र पुनर्स्थापनाका लागि अन्तर्राष्ट्रिय सहायता आवश्यक पर्ने उनले बताए।
पूर्वाधार, सडक, पुल र जलविद्युत्मा भएको विनाशको स्तर ठूलो छ। त्यसैले दीर्घकालीन पुनर्निर्माण र पुनर्स्थापनाका लागि हामीलाई निश्चित रूपमा अन्तर्राष्ट्रिय सहायता आवश्यक पर्नेछ। विस्तृत मूल्यांकन पूरा भएपछि आवश्यकताका आधारमा हामी ती विषयमा जानकारी गराउनेछौं,' उनले भने।
