जेनजी आन्दोलनको मर्मबारे प्रश्न उठाएकी आफ्नै पार्टीकी सांसद तथा सचेतकलाई गृहमन्त्री सुधन गुरूङले ह्वाट्सएप ग्रुपमा हप्काएका छन्।
झन्डै एक दर्जन 'जेनजी' सांसदहरू रहेको ह्वाट्सएप ग्रुपमा गृहमन्त्री गुरूङ रास्वपा सचेतक क्रान्तिशिखा धितालमाथि हेपाहा शैलीमा प्रस्तुत भएका हुन्।
उनले 'खोला तर्यो, लौरो बिर्सयो' भन्दै क्रान्तिशिखालाई जेनजी आन्दोलनमा आफूहरूसँग नलडेको भन्दै प्रश्न गरेका छन्।
जबाफमा धितालले 'गृहमन्त्रीज्यू, तपाईंको तमिज भएन' भन्दै 'जेनजीको आन्दोलन तपाईं एक्लैको हो भन्ने भ्रमबाट निस्कन' भनेकी छन्।
यो विवाद भदौ २३ गते नयाँ बानेश्वरस्थित पुरानो संसद भवनमा आयोजित जेनजी स्मृति दिवसको कार्यक्रमलाई लिएर सुरू भएको हो।
उक्त कार्यक्रममा विवादास्पद धर्मगुरूहरूलाई समेत मञ्चमा राखिएको थियो। कार्यक्रममा सहभागी रास्वपा सचेतक धितालले त्यसप्रति असन्तुष्टि जनाउँदै सामाजिक सञ्जालमा प्रश्न उठाएकी थिइन्।
'मलाई थाहा छैन, त्यो स्टेज किन त्यसरी खडा गरियो? त्यहाँ भएका धर्मगुरूको अर्थ के थियो?' उनले लेखेकी थिइन्, 'त्यो कार्यक्रमले ती परिवारको पीडा कसरी सम्बोधन गर्यो, जसले आफ्ना सन्तान गुमाएका छन्, जसका शरीरमा आज पनि आन्दोलनका घाउ छन्, तिनले के बुझे, मलाई थाहा छैन।'
त्यसै दिनको कार्यक्रममा गृहमन्त्री गुरूङले पत्रकारहरूप्रति पनि आक्रोश व्यक्त गरेका थिए।
उनले 'तीन–चार जना पत्रकारलाई सुध्रन' चेतावनी दिएका थिए। यद्यपि उनले कसलाई लक्षित गरेको हो भन्ने खुलाएका थिएनन्।
कार्यक्रमपछि धितालले गृहमन्त्रीको उक्त अभिव्यक्तिमाथि समेत प्रश्न उठाइन्।
'पोहोर साल हामीले नै होइन प्रेस स्वतन्त्र होस्, सत्ता निरंकुश नबनोस्, जसको जुन स्थान हो, ऊ त्यही स्थानमा बसोस् भनेर सडकमा उत्रिएको?' उनले फेसबुकमा लेखेकी थिइन्, 'हामीले राज्यलाई प्रश्न गरेका थियौँ। सत्तालाई विनम्र हुन भनेका थियौं।'
उनले प्रश्न गरेकी थिइन्, 'अहिले आफूहरूमाथि प्रश्न गर्नेहरूलाई किन धम्की र चेतावनीको भाषा बोलिँदैछ?'
'त्यो बेलाको सरकारले अभिव्यक्ति स्वतन्त्रता हनन गरेको भनेर सडकमा गएका थियौं हामी। के आज हामी अभिव्यक्ति स्वतन्त्रतालाई बल पुग्ने काम गर्दैछौं?' क्रान्तिशिखाले लेखेकी थिइन्।
यही स्ट्याटसपछि जेनजी सांसदहरू रहेको ह्वाट्सएप ग्रुपमा गृहमन्त्री गुरूङ र सचेतक धितालबीच चर्काचर्की भएको हो।
सेतोपाटीले स्रोत उल्लेख नगर्ने सर्तमा एक सांसदमार्फत उक्त ह्वाट्सएप ग्रुपको कुराकानी हेरेको छ।
'थाहा नभएको कुरा किन बोलेको?'
ग्रुपमा गुरूङले धिताललाई मेन्सन गर्दै लेखेका छन्– 'क्रान्तिशिखा, थाहा नभएको कुरा किन बोलेको?'
त्यसपछि उनले नयाँ बानेश्वरको कार्यक्रम सहिद तथा घाइते परिवारले आफ्नो तरिकाले आयोजना गरेको दाबी गरेका छन्।
तर त्यसपछि गुरूङको भाषा थप आक्रामक हुँदै गएको देखिन्छ। उनी हेपाहा शैलीमा प्रस्तुत भएको देखिन्छ।
'खोला तर्यो, लौरो बिर्सने मान्छेहरूका लागि हामीले आन्दोलन गरेको होइन,' उनले लेखेका छन्, 'म यही कुरा सदनमा भन्नेवाला छु। सबैको अगाडि स्ट्याटस लेख्ने मान्छेले सुन्ने हो अब।'
धितालले आन्दोलनको मर्म नबुझेको आरोप लगाउँदै उनले आन्दोलनमा ज्यान फालेर आएका आफ्ना अन्य सांसदसँग उनको तुलना गरेका छन्।
'न आन्दोलनको मर्म थाहा छ, न आन्दोलनमा ज्यान फालेर हाम्रा अरू सांसदजस्तो आएको छ। बुझ्नु पनि छैन, सोध्नु पनि छैन। प्याच्च पारेर स्ट्याटस लेखेर आफ्नै पार्टी, आफ्नै साथीहरूलाई कमजोर देखाउन खोज्ने?' उनले लेखेका छन्।
गुरूङले यो पनि लेखेका छन्, 'तपाईं पार्टीको कुरा गर्नुहुन्छ। हाम्रोबारेमा बोल्नका लागि हामीलाई तपाईं चाहिँदैन।'
'गृहमन्त्रीज्यू, तपाईंको तमिज भएन'
ग्रुपमा रहेका केही सांसदले उक्त विवादलाई त्यहीँ रोक्न खोजेका देखिन्छन्।
सांसद बब्लु गुप्ताले आपसमा झगडा नगर्न आग्रह गरेका छन्।
खिमा विश्वकर्माले पनि नयाँ बानेश्वरको कार्यक्रममा सहभागी भएका व्यक्तिहरूबारे प्रश्न उठाएकी छन्।
ग्रुपमा सदुन नामका सांसदले जेनजीको पक्षमा बोल्दा आफू सधैं एक्लो हुने गरेको बताएका छन्।
त्यसको जबाफमा गुरूङले लेखेका छन्, 'सदनमा त सबै त्यही जेनजी आन्दोलनले आएको होला नि, एक–एक जना।'
गृहमन्त्री लगातार हेपाहा शैलीमा प्रस्तुत भएपछि क्रान्तिशिखाले पनि कडा जबाफ फर्काएकी छन्।
'गृहमन्त्रीज्यू, तपाईंको तमिज भएन,' उनले लेखेकी छन्।
त्यसपछि उनले जेनजी आन्दोलनको स्वामित्व कुनै एक व्यक्तिले लिन नसक्ने भन्दै गुरूङलाई सचेत गराएकी छन्।
'अपराधीलाई छेउमा राखेर जेनजीको माग पूरा हुन्छ र जेनजीको आन्दोलन तपाईं एक्लैको हो भन्ने लाग्छ भने भ्रमबाट निस्कनुहोस्,' धितालले लेखेकी छन्, 'सि यू इन द पार्लियामेन्ट। आइ फिल पिटी फर यू।'
'तमिज सिकाउनु पर्दैन मलाई'
धितालको उक्त जबाफपछि गुरूङले फेरि प्रतिक्रिया दिएका छन्।
'हेल्लो क्रान्तिशिखा, तमिज सिकाउनु पर्दैन मलाई,' उनले लेखेका छन्, 'आफै बस्ने। आइ फिल मोर पिटी फर यू।'
त्यसपछि उनले फेरि 'खोला तरेर लौरो बिर्सने' भन्दै धिताललाई प्रश्न गरेका छन्।
'कसरी आयौ (संसदमा) नबिर्सौं, हाहा.... के तिमीले हाम्रो साथमा लडेकी हौ? तिमी कहाँ थियौ? जेनजीले ६ महिना सरकार चलाउँदा कहाँ थियौ? अहिले पाकेको फल खाएर ठूला कुरा गर्ने?' उनले लेखेका छन्।
पार्टीकै सांसदहरूबीच विवाद चर्किएपछि सांसद सुशान्त वैदिकले दुवै पक्षलाई सम्झाउने प्रयास गरेका छन्।
'केही कन्फ्युजन भए बसेर सुल्झाऔं,' वैदिकले लेखेका छन्, 'सरकार हाम्रो भए पनि सत्ता हाम्रो भइसकेको छैन। न्यायपालिकामा अप्ठ्यारो छ। कसरी जाने भन्ने योजना बनाऔं।'
उनले पार्टीभित्रकै जेनजी सांसदहरूबीच विवाद बढे बाहिरका पीडितलाई न्याय दिन कठिन हुने भन्दै सचेत गराएका छन्।
'पार्टीभित्रकै जेनजी लड्यौं भने बाहिरलाई न्याय कसरी दिने?' उनले लेखेका छन्।
तर त्यसपछि पनि गुरूङ रिसाइरहेका सुनिन्छन्।
'हामीजस्तो लडेर आएको भए पो थाहा हुन्छ यो सरकारको महत्त्व। तमिज सिकाउने रे ... आफै बस्ने तमिजमा, बुझ्यौ,' उनले लेखेका छन्।
धिताल भन्छिन्– 'व्यक्तिगत रूपमा कुनै समस्या छैन'
सेतोपाटीले गृहमन्त्री गुरूङले हप्काएको विषयमा रास्वपा सचेतक धितालसँग प्रतिक्रिया मागेको थियो।
उनले ह्वाट्सएपमा भएका मेसेजबारे आफूलाई जानकारी नभएको बताउँदै गृहमन्त्रीसँग व्यक्तिगत रूपमा आफ्नो कुनै समस्या नरहेको बताइन्।
'तपाईंले कुन मेसेज हेर्नुभयो, मलाई थाहा छैन,' धितालले भनिन्, 'गृहमन्त्रीसँग मैले व्यक्तिगत कुरा गरेको छु। कुनै समस्या छैन।'
उक्त ह्वाट्सएप ग्रुपमा रास्वपाका सांसदहरू करिष्मा कठरिया, केपी खनाल, रचना खत्री, सृष्टि भट्टराई, स्मृति सेञ्चुरी, प्रशान्त उप्रेती, शिव यादव, आकृति अवस्थी, खिमा विश्वकर्मा, सुशान्त वैदिक, बब्लु गुप्ता, अफसाना बानु लगायत छन्।
-1746009348.jpg)
