नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले स्थानीय तह र प्रदेशसभाको निर्वाचन एकैसाथ गर्ने वा छुट्टाछुट्टै गर्ने भन्ने विषयमा राजनीतिक दलहरूबीच थप छलफल आवश्यक रहेको बताएका छन्।
निर्वाचन आयोगले राष्ट्रिय मान्यता प्राप्त राजनीतिक दलहरूसँग गरेको छलफलमा प्रचण्डले संविधान र कानुनलाई आधार मानेर निर्वाचन सम्पन्न गर्नुपर्ने बताए।
‘एकैसाथ गर्ने कि छुट्टछुट्टै गर्ने भन्ने पनि प्रश्न छ। संविधान र कानुनलाई आधार मानेर नै निर्वाचन सम्पन्न गर्न सक्छौँ,’ उनले भने।
विगतमा प्रदेशसभा र प्रतिनिधिसभाको निर्वाचन एकैसाथ तथा छुट्टाछुट्टै दुवै तरिकाले गरिएको स्मरण गर्दै उनले यस विषयमा राजनीतिक दलहरूले छलफल गरेर टुङ्गो लगाउने बताए।
‘पहिले–पहिले प्रदेश र सङ्घको चुनाव एकैचोटि पनि गरेका छौँ। अलगअलग पनि गरेका छौं,’ उनले भने, ‘योबारे राजनीतिक दलले अझै छलफल गरेर टुङ्ग्याउने भनिएको छ।’
उनले निर्वाचनको समयभन्दा दुवै तहका जनप्रतिनिधिले पूरा पाँच वर्ष काम गर्न पाउने सुनिश्चितता महत्त्वपूर्ण रहेको बताए।
‘दुवै तहका जनप्रतिनिधिहरूले पाँच वर्ष काम गर्न पाउने सुनिश्चित हुनुपर्छ। पाँच वर्षको कुरा मुख्य कुरा हो। चुनाव दुई महिना अगाडि गर्ने वा पछाडि गर्ने मुख्य होइन,’ प्रचण्डले भने।
यस विषयमा सबै पक्षसँग थप छलफल गरेर अर्को बैठकमा टुङ्गो लगाउने सहमति भएको उनले बताए।