तनहुँमा लम्पी स्किन रोगका कारण गोरु मरेपछि कृषकलाई खेत जोत्न समस्या भएको छ। धान रोपाइँको चटारोका बीचमा गोरु मरेपछि कृषकलाई समस्या भएको हो।
जिल्लाका दशवटै पालिकाका चार हजार एक सय ७६ पशुमा लम्पी स्किन रोग फैलिएकामा ४७ पशु मरेका छन्। तीमध्ये ४३ गोरू रहेको भेटेनरी अस्पताल तथा पशु सेवा विज्ञ केन्द्र तनहुँका प्रमुख डा. बालकुमार श्रेष्ठले जानकारी दिए।
‘खेतीपातीको समयमा गोरु मर्दा कृषकलाई खेत जोत्न समस्या भएको छ। गोरुको विकल्प ट्र्याक्टर भए पनि कतिपय किसानले ट्र्याक्टर किन्न सक्ने अवस्था छैन,’ उनले भने।
गोठको गोरू मरेपछि ट्याक्टर लगाउनसक्ने आर्थिक अवस्था नभएकाहरूलाई रोपाइँ गर्न गाह्रो परेको छ।
उनका अनुसार लम्पी स्किन संक्रमण हुँदैमा पशु मरिहाल्ने होइन। ' बिरामी भएको अवस्थामा पनि काम गर्नुपर्दा पशुलाई गाह्रो भएर मृत्यु भएको देखिएको छ,’ डा. श्रेष्ठले भने।
लम्पी स्किनविरुद्ध जिल्लामा दस हजार पाँच सय पशुलाई खोप लगाइसकिएको छ। स्थानीय तहको समन्वयमा लम्पी स्किन संक्रमणबाट बचाउन दस हजार पाँच सय स्वस्थ पशुलाई खोप लगाइएको श्रेष्ठले जानकारी दिए।
उनले भने, ‘यो खोप संक्रमित भएको पशुलाई नभई संक्रमण नभएका पशुलाई रोगबाट बचाउन लगाउने हो।’
सबैभन्दा बढी व्यास नगरपालिकाका पशुलाई खोप लगाइएको छ। व्यासमा तीन हजार पशुलाई खोप लगाइएको कार्यालयले जनाएको छ। खोप लगाउनका लागि स्थानीय तहले आफै खरिद गरेका थिए।
नगरपालिकाले कृषकको गोठमै पुगेर खोप लगाइदिएको नगरपालिकाका पशुपन्छी विकास उपशाखा प्रमुख डा. मनोज विश्वकर्माले जानकारी दिए।
पशुमा पूर्ण खोप कार्यक्रमअन्तर्गत नगरपालिकाको वडामा खोपकर्ताको रुपमा खटिएका भेटेनरी प्राविधिकलाई पुनः यस आकस्मिक अवस्थामा खोप लगाउन परिचालित गरिएको उनले जानकारी दिए।
उक्त रोगबाट धेरैजसो व्यास नगरपालिका–१ चारकुने, व्यास नगरपालिका–१३ बेलबास, पोखरीभज्याङ, व्यास नगरपालिका– ११ फराकचौर र व्यास नगरपालिका–७ मा गाईभैँसी संक्रमित भएका थिए।
जिल्लाको म्याग्दे गाउँपालिकाले दुई हजार गाईभैँसीलाई उक्त खोप लगाएको छ। गाउँपालिकाले सातवटै वडामा पालिएका पशुलाई खोप लगाएको पशु सेवा शाखा प्रमुख डा. विनय शाहले जानकारी दिए। उनका अनुसार पहिलो चरणमा दूध उत्पादन धेरै हुने वडाका पशुलाई प्राथमिकतामा राखेर खोप लगाइएको हो।
‘व्यावसायिक रुपमा गाई भैँसीपालन गरिएका र दूध उत्पादन बढी गर्ने कृषकको गोठमै पुगेर खोप लगाएका छौँ,’ उनले भने।
पहिलो चरणमा दुई हजार खोपको मात्रा आएकाले सोहीअनुसार खोप लगाइएको र आवश्यक परे थप खोप खरिद गरिनेछ।
भानु नगरपालिकाका केही ठाउँमा भने कृषकले पशुलाई यो खोप लगाउन आनाकानी गरेका छन्। अन्य पालिकामा भने सहजरुपमा खोप लगाइएको छ।
--1715160207.JPG)
