चौकीदार नियुक्ति विवादमा कास्की जिल्ला कारागारका कैदीबन्दीले आइतबार नाराबाजी गरेका छन्।
कैदीबन्दीले प्रकाश गुरूङलाई चौकीदार नियुक्त गर्न माग गरे पनि कारागार व्यवस्थापन विभागले अजय गुरूङलाई नियुक्त गरेको भन्दै कैदीबन्दीले नाराबाजी गरेका हुन्।
उनीहरूले कारागारभित्र हो-हल्लाका साथै नाराबाजी गरेपछि थप प्रहरी खटाइएको छ।
कास्कीका प्रमुख जिल्ला अधिकारी रूद्रादेवी शर्माले कारागारमा केही समस्या आएकाले सुरक्षाकर्मी खटाएको बताइन्।
‘कारागारमा चौकीदार नियुक्तिका विषयमा असन्तुष्ट भएर केही समस्या आएकाले सुरक्षाकर्मी पठाएका छौं,’ उनले भनिन्, ‘समस्या समाधान भइहाल्छ।’
जिल्ला कारागार कास्कीका प्रमुख राजेन्द्र शर्माले पनि चौकीदार नियुक्तिका विषयमा कैदीबन्दीले असन्तुष्टि पोखेको बताए। उनले थप जानकारी दिन चाहेनन्।
जिल्ला कारागार कास्कीमा अहिले ३ वटा ब्लकमा कैदीबन्दी छन्। दुइटा ब्लकमा पुरूष कैदीबन्दी छन् भने एउटामा महिला छन्। जिल्ला कारागारमा ४२० जना कैदीबन्दी राख्ने क्षमता भए पनि ७ सयभन्दा बढी कैदीबन्दी राखिएको छ।
लमजुङ जिल्ला कारागारको पर्खाल भत्किएर शनिबार ७८ जना कैदीबन्दी कास्कीमा थप गरिएका थिए। यसले पनि संख्या बढाएको सिडिओ शर्माले बताइन्।
कारागार व्यवस्थापन विभागले ३ सदस्यीय समिति गठन गरेर चौकीदार नियुक्त गर्ने गरेको विभागका प्रवक्ता कल्पना घिमिरे नेपालले बताइन्। कास्की कारागारमा चौकीदार नियुक्तिका विषयमा आफू बाहिर भएकाले जानकारी नरहेको बताइन्।
-1746009348.jpg)
