कैलालीमा कारागार चलान भएको दोस्रो दिनमै एक जना बन्दीको मृत्यु भएको घटनामा प्रहरी नायब निरीक्षक (सई) हरिजित नाथ पुर्पक्षका लागि थुनामा पठाइएका छन्।
कैलालीका प्रहरी प्रमुख एसपी बालनरसिंह राणाका अनुसार ६ दिन पहिले सई नाथलाई जिल्ला अदालतले पुर्पक्षका लागि थुनामा पठाउन आदेश भएबमोजिम थुनामा पठाइएको बताए।
बैंकिङ कसुर मुद्दामा कैलाली कारागारमा असार १ गते चलान गरिएका डडेल्धुराको भागेश्वर गाउँपालिका – ५ का २८ वर्षीय व्यवसायी हरिशसिंह पालीको साउन २ गते राति मृत्यु भएको थियो।
प्रहरीका अनुसार पालीका विरूद्ध जिल्ला अदालत कैलालीले २०८० /११/ २९ गते बैंकिङ कसुरमा १० दिन कैद र दुई लाख जरिवानाको फैसला सुनाएको थियो। मृतक पालीविरूद्ध २०८०/०१/२१ गते बैंकिङ कसुर सम्बन्धी मुद्दा दायर भएको थियो।
कैलालीका प्रहरी प्रवक्ता डिएसपी राजकुमार सिंहका अनुसार बैंकिङ कसुर मुद्दामा पाली जेठ २९ गते डडेल्धुराको अमरगढी नगरपालिका–५ स्थित तुफानडाँडाबाट पक्राउ परेका थिए।
तर, उनलाई सई नाथकै योजना अनुसार ढिला गरी उनलाई जेठ ३० गते बेलुकीपख कैलाली ल्याइएको थियो। जेठ ३१ गते शनिबार परेको हुँदा असार १ गते मात्रै पालीलाई अदालतमा उपस्थित गराइएको थियो।
अदालतको आदेशले तोकिएको सजाय भुक्तानीका लागि पालीलाई सोही दिन जिल्ला कारागार कैलालीमा चलान गरिएको थियो।
कारागार चलान भएको दोस्रो दिन राति पाली एकाएक बिरामी भएका थिए।
सोमबार राति साढे ११ बजेतिर उनलाई उपचारका लागि सेती प्रादेशिक अस्पतालमा पुर्याइएको थियो। चिकित्सकले उनलाई राति सवा १२ बजे मृत घोषणा गरेका थिए।
पालीका आफन्तले मृतक पालीको शरीरमा निलडाम तथा चोटपटक देखिएको भन्दै कारागारभित्र चरम याताना दिई हत्या गरेको दाबी गरेका थिए। तर, प्रहरी अधिकारी भने पोष्टमार्टम रिपोर्टपछि मात्रै पालीको मृत्युको कारण स्पष्ट भन्न सहज हुने बताउँदै आएका थिए। हालसम्म पनि प्रहरीले पालीको पोष्टमर्टम रिपोर्टबाट देखिएको कुरा सार्वजनिक गरेको छैन।
घटनाको विरोधमा डडेल्धुरा बजार बन्द गरिनुका साथै चक्काजाम समेत गरिएको थियो। त्यसपछि कैलालीका सहायक प्रमुख जिल्ला अधिकारीको संयोजकत्वमा सत्यतथ्य छानबिन समिति गठन भएको थियो। त्यो समितिको निर्देशनमा सई नाथ पक्राउ परेका थिए।
मृतक पालीका आफन्तले सुरूदेखि नै सई नाथको व्यवहार शंकाष्पद भएको दाबीका साथ कारबाहीको माग गर्दै आएका थिए।
नाथले पटक–पटक फोन गरी पालीसँग रकम माग्ने गरेको आरोप आफन्तको थियो। परिवारका सदस्यले असार २ गते मात्रै ८५ हजार रुपैयाँ नाथको खातामा पठाइएको बताएका थिए।
यो पनि:
कारागार चलान भएको दोस्रो दिनमै बन्दीको मृत्यु
-1746009348.jpg)
