धनुषामा नागरिकता सिफारिस लिन गएकी किशोरीमाथि यौन दुर्व्यवहार गरेको आरोपमा प्रहरीले वडाध्यक्षलाई पक्राउ गरेको छ।
जनकपुर उपमहानगरपालिका-११ का वडाध्यक्ष अर्जुन चौधरीलाई प्रहरीले पक्राउ गरेको हो। चौधरी अघिल्लो स्थानीय तह निर्वाचनमा कांग्रेसबाट निर्वाचित वडाध्यक्ष हुन्।
१७ वर्षीया किशोरीमाथि यौन दुर्व्यवहार गरेको आरोपमा उनलाई गत बिहीबार पक्राउ गरिएको जिल्ला प्रहरी कार्यालय धनुषाका डिएसपी वरूणबहादुर सिंहले जानकारी दिए।
किशोरीले बिहीबार नै कार्यालयमा आएर आफूमाथि यौन दुर्व्यवहार भएको जाहेरी दिएकी थिइन्। उनले आफू नागरिकताको सिफारिस लिन जाँदा यौन दुर्व्यवहार गरेको जाहेरीमा उल्लेख गरेकी छन्।
कक्षा-१२ को परीक्षा दिएर बसेकी किशोरी नागरिकता बनाउन पहिलोपल्ट गत मंगलबार आमासँग वडा कार्यालय पुगेकी थिइन्। उनका बुवा रोजगारीका लागि विदेशमा छन्।
उनीहरू पहिला सोही उपमहानगरपालिकाको वडा नम्बर २५ मा बस्थे। अहिले ११ मा बस्छन्।
'बसाइँसराइको कागजात आवश्यक पर्ने भनेपछि त्यो दिन त्यसै फर्किनु पर्यो,' किशोरीले सेतोपाटीसँग भनिन्, 'हामी दोस्रो दिन बुधबार वडाध्यक्षले भनेअनुसार वडा नम्बर २५ को कार्यालयमा गएर कुराकानी गरेर फर्कियौं।'
वडा नम्बर २५ मा कुराकानी भइसकेको जानकारी किशोरीको आमाले वडाध्यक्ष चौधरीलाई दिइन्। उनले बिहीबार कार्यालयमा आउन भने।
सोही अनुसार बिहीबार बिहानै किशोरी र उनकी आमा वडा कार्यालय पुगे।
किशोरीको आमाछोरी वडा कार्यालयमा गएपछि वडाध्यक्ष चौधरीले सचिवलाई बसाइँसराइको कागजात लिन पठाएको उनीहरूले जानकारी दिए।
'मैले बसाइँसराइको कागजात लिन सचिवलाई पठाएको छु। तिम्रो नागरिकता बन्छ। तर मैले जे जे भन्छु त्यो गर्नुपर्छ,' वडाध्यक्षको भनाइ उद्धृत गर्दै किशोरीले भनिन्- 'कागजातको विषयमा भनिएको होला भन्ने लागेर हामीले 'हुन्छ' भनिदियौं।'
सचिवलाई कागजात लिएर फर्किन समय लाग्ने भएपछि वडाध्यक्षले फोन गरेर बोलाउने भनेर आफूहरूलाई त्यसै फर्काइदिएको उनी बताउँछिन्।
बिहीबार पनि नागरिकता नबन्ने भयो भन्दै त्यसै फर्किनु पर्यो।
सोही दिन अपराह्नतिर वडाध्यक्षले आफूलाई फोन गरेर सचिवले बसाइँसराइको कागजात आफ्नो घरमा ल्याइदिएको र लिन आउन भने।
वडाध्यक्षले कागजात लिन घरमा बोलाएको किशोरीले आमालाई जानकारी दिइन्। वडाध्यक्षको घर किशोरीको घरबाट १०/१५ मिनेटको दुरीमा पर्छ।
नजिकै भएकाले आमाले उनलाई कागजात लिन पठाइन्।
'बसाइँसराइको कागजात लिएर आउनु भन्नुभयो। म एक्लै लिन गएँ,' उनले भनिन्, 'वडाध्यक्षको घरमा पुग्दा एक जना वृद्ध त्यही थिए। उहाँ सिडिओ हो। तिम्रो नागरिकता उहाँले नै बनाउने हो। जे जे माग्नुहुन्छ त्यो दिनू भनेर भन्नुभयो। हुन्छ भनेँ।'
उनले थपिन्- 'म पुगेको एकैछिनमा सिडिओ भनेर चिनाउनु भएको व्यक्ति निस्किनुभयो। त्यसपछि उहाँले कागजात मिलाउँदै छु एकछिन बस्न आग्रह गर्नुभयो।'
किशोरी उनको घरको कोठामा बसिरहेकी थिइन्। वडाध्यक्षले गेट लगाए। किशोरीले किन लगाउनु भएको भनेर प्रश्न गरिन्।
'हाम्रो सूचना लिक हुनसक्छ। त्यसैले लगाएको हुँ भनेर जबाफ दिनुभयो। मैले पत्याएँ,' किशोरीले भनिन्, 'त्यसपछि तिम्रो कागजात के के छ देखाऊ भनेर भन्नुभयो। मैले मोबाइल खोल्दैथिएँ। मेरो स्तनमा समातेर चुम्न थाल्नुभयो। शरीरका गोप्य अंग छुनुभयो।'
किशोरी उनलाई चिच्याउँदै धकेलेर भाग्न खोजिन्। तर सकिनन्।
'बेस्सरी अंगाल्नु भएको थियो। आफूले भनेअनुसारको गरेमा छिट्टै सिफारिस गरिदिने र राम्रो भविष्य बनाइदिने कुरा गर्नुभयो,' किशोरीले भनिन्, 'सिडिओले भनेको मानेमा झनै सजिलो हुन्छ भन्न थाल्नुभयो।'
आफूले सिफारिस नगरेसम्म नागरिकता नबन्ने भन्दै शरीरका गोप्य अंग छुन थाल्नुभयो। त्यसैबीच जबरजस्ती धकेलेर आफू त्यहाँबाट भागेको किशोरी बताउँछिन्।
त्यहाँबाट निस्किनसाथ किशोरीले उनका दाइ र आमालाई फोन गरिन्। उनको दाइले फेरि त्यही वडाध्यक्षको घरमा जान भने। उनी गइन्।
उनका दाजुहरू घर बाहिर बसेका थिए। उनी भित्र जानसाथ वडाध्यक्षले पहिलाकै जस्तो हर्कत गर्न थालेपछि चिच्चाइन्। उनी चिच्याएको सुन्नसाथ उनका दाजुहरूले वडाध्यक्षलाई समातेर प्रहरीकोमा पुर्याएको उनको भनाइ छ।
'प्रहरीले घटनाबारे सोध्नुभयो। मैले सबै भनिदिएँ,' उनी भन्छिन्, 'त्यसपछि कानुनी कारबाही अगाडि बढ्यो।'
प्रहरीले वडाध्यक्षविरूद्ध बालयौन दुर्व्यवहार कसूरमा मुद्दा चलाएको छ। चौधरीविरूद्ध शुक्रबार जिल्ला अदालतबाट ५ दिन म्याद थप गरेर अनुसन्धान भइरहेको डिएसपी सिंहले जानकारी दिए।
-1746009348.jpg)
