नेपाल भारत संयुक्त सीमा कार्यदलले आउँदो महिना काठमाडौंमा सर्भे अधिकृतहरूको कमिटीको बैठक गर्ने सहमति जुटाएको छ।
सन् २०१९ भारतको देहरादुनमा भएको बैठकपछि यस्तो कमिटीको बैठक हुन सकेको थिएन।
समितिले सीमाको सुपरीवेक्षण, पिलरहरूको मर्मत गर्ने सम्बन्धि नयाँ तौर तरिकाहरूलाई स्वीकार गरेको छ।
दुई देशले नयाँ प्रविधिको प्रयोग गरेर सीमाको सर्भे गर्ने र नक्सांकन गर्ने विषयम पनि सहमति जुटाएको परराष्ट्र मन्त्रालयले जनाएको छ।
कार्यदलको बैठकमा नेपालका तर्फबाट नापी विभागका महानिर्देशक प्रकाश जोशी र भारतका तर्फबाट हितेशकुमार मकवानाले नेतृत्व गरेका थिए।
सेतोपाटीसँग कुराकानी गर्दै जोशीले कार्यदल दुई देशबीचको सीमाका विषयमा काम गर्ने स्थायी संयन्त्र भएको उल्लेख गर्दै रोकिएको स्थलगत काम अघि बढ्ने बताए।
‘अब सीमा निरीक्षण, दशगजा क्षेत्रमा भएका गतिविधिको निगरानी, जिपिएसबाट सीमाका पिलरहरुको निरीक्षण लगायतका काम हुनेछन्,’ जोशीले सेतोपाटीसँग भने, ‘फिल्डमा गएर काम गर्ने कमिटीहरूको अब बैठक बस्छ र त्यसले बाँकी काम अघि बढाउँछ।’
-1746009348.jpg)
