रसुवाको गोसाईकुण्ड गाउँपालिका–६ सोलेस्थित खोलामा मोटरसाइकल दुर्घटनामा परेका दुई जनाको शव फेला परेको छ।
सशस्त्र प्रहरी बलका सहप्रवक्ता डिएसपी शैलेन्द्र थापाका अनुसार भदौ १५ गते दुर्घटनामा परी बेपत्ता भएका दुई जनाको मंगलबार शव फेला परेको हो।
गोसाईकुण्ड गाउँपालिका–६ ठाडे बस्ने २४ वर्षीय सुदिप घले र २३ वर्षीय दावा डेण्डुप तामाङ एएए–३८१७ नम्बरको मोटरसाइकलमा धुन्चेतर्फ गएका थिए। तर सम्पर्कमा नआएपछि आफन्तले भदौ १७ गते बिहान प्रहरीमा निवेदन दिएका थिए।
निवेदनपछि धुन्चे चेकपोस्टमा जडान गरिएको सिसिटिभी फुटेज हेर्दा भदौ १५ गते राति करिब १० बजे उनीहरू मोटरसाइकलमा ठाडेतर्फ गएका देखिएको थियो। त्यसकै आधारमा नेपाली सेना, नेपाल प्रहरी र सशस्त्र प्रहरीको संयुक्त टोली भदौ १७ गते बिहानदेखि खोजतलासमा परिचालन भएको डिएसपी थापाले बताए।
उनका अनुसार, घटनाको प्रकृति हेर्दा मोटरसाइकल सडकबाट करिब २५० मिटर तल खोलामा खसेर दुर्घटना भएको देखिन्छ।
दुवै जनाको शव रोप रेस्क्यु विधि प्रयोग गरेर निकालिसकेको डिएसपी थापाले बताए।
-1756794700.JPG)
-1746009348.jpg)
