न्याय परिषदले ६ जनालाई जिल्ला न्यायाधीशमा नियुक्त गर्न सिफारिस गरेको छ।
परिषदको मंगलबार बसेको बैठकले ६ जनालाई न्यायाधीशमा नियुक्ति सिफारिस गरेको सूचना अधिकारी सुमन पाण्डेले जानकारी दिए।
जिल्ला सरकारी वकिलको कार्यालय काठमाडौंका जिल्ला न्यायाधिवक्ता गोकुलबहादुर निरौला सिफारिसमा परेका छन्। उनको कैलाली जिल्ला अदालतमा सिफारिस गरिएको छ।
त्यस्तै, प्रशासकीय अदालतका उपरजिस्ट्रार अरूणकुमार कोइराला पनि सिफारिसमा परेका छन्। उनलाई डडेल्धुरा जिल्ला अदालतमा पठाउने सिफारिस गरेको छ।
रोल्पा जिल्ला अदालतका स्रेस्तेदार कुलप्रसाद दाहाल, सर्वोच्च अदालतका इजलास अधिकृत सूर्यप्रसाद भण्डारी, उपरजिस्ट्रार अनुपमा पन्त र कानून, न्याय तथा संसदीय मामिला मन्त्रालयका उपसचिव विश्वदीप वेस्रालाई पनि सिफारिस गरेको छ।
दाहाललाई कन्चनपुर, भण्डारीलाई धनुषा र वेस्रालाई रौतहट जिल्ला अदालतमा सिफारिस गरिएको छ।
न्याय परिषदको मंगलबारकै बैठकले कात्तिक १७ रूपन्देही क्षेत्र नम्बर ३ र मनाङ (२) मा हुने प्रदेश सभाको उपनिर्वाचनका पनि मुख्य निर्वाचन अधिकृतका लागि परामर्श दिएको छ।
रूपन्देहीका लागि जिल्ला न्यायाधीश अशोककुमार बस्नेत र मनाङका लागि जिल्ला न्यायाधीश लालकाजी श्रेष्ठलाई मुख्य निर्वाचन अधिकृत बनाउन परामर्श दिएको छ।
-1746009348.jpg)
