वीरगञ्जको भन्सार क्षेत्रमा गोली चलेको छ। गोली लागेर एक युवती घाइते भएकी छन्।
भारत बेतिया बस्ने गोलु सहनीको छोरी अन्दाजी १८ वर्षीया निशा कुमारी सहनी घाइते भएकी हुन्। बाँया गालामा गोली लागेको उनको अवस्था गम्भीर छ।
वीरगञ्जको नारायणी अस्पतालमा उपचार भइरहेको प्रहरीले जनाएको छ।
वीरगञ्ज महानगरपालिका वडा नं १६ मा रामप्रवेश गुप्ताले सञ्चालन गरेको खाजा पसलमा उनलाई गोली हानिएको थियो।
भारत झारखण्ड जिल्ला पाकु ग्राम पञ्चायत मालपाहारी बस्ने अन्दाजी २७ वर्षीय प्रदीप शर्माले उनलाई गोली हानेका थिए।
निशालाई गोली हानेर भारततर्फ भाग्दै गरेको उनलाई सीमा क्षेत्रबाट पक्राउ गरिएको जिल्ला प्रहरी कार्यालय पर्साका प्रमुख प्रहरी उपरीक्षक गौतम मिश्रले जानकारी दिए।
‘घटना गराएर प्रदीप भारततर्फ भाग्दै थिए, तर सीमा क्षेत्रबाटै हतियार सहित पक्राउ गर्न सफल भएका छौं,’ प्रहरी उपरीक्षक गौतमले भने।
प्रदीपको साथबाट होममेड सिक्सर पेस्तोल, त्यसमा लाग्ने गोली तीन राउण्ड र एउटा खोका समेत बरामद भएको प्रहरी उपरीक्षक मिश्रले जानकारी दिए।
उनलाई जिल्ला प्रहरी कार्यालय पर्साको हिरासतमा राखेर घटनाबारे थप अनुसन्धान गरिरहेको प्रहरीले जनाएको छ।
वीरगञ्ज रक्सौल नाकास्थित शंकराचार्य गेट नजिकै रहेको प्रहरी चौकी इनर्वाबाट ३ सय मिटर उत्तरतर्फ घटना भएको थियो।
-1746009348.jpg)
