दाङमा स्थानीय प्रशासनले शुक्रबार बेलुका ५ बजेदेखि शनिबार बिहान ५ बजेसम्म कर्फ्यू आदेश जारी गरेको छ।
शुक्रबार बिहानदेखि दिउँसो १ बजेसम्म निषेधआज्ञा जारी गरिएको थियो। त्यो बीचमा मानिसहरू बजारमा किनमेल गर्न निस्किएका थिए। पेट्रोल पम्पहरूमा सवारी साधनमा तेल हाल्नेहरूको भिड देखिन्थ्यो।
जेनजीको प्रदर्शनका नाममा उग्र बन्दै सरकारी कार्यालयका साथै राजनीतिक दलका पार्टी कार्यालय, अदालत, नेताका घरहरूमा तोडफोड तथा आगजनी भएपछि स्थानीय प्रशासनले भदौ २४ गते बेलुकी साढे ४ बजेदेखि जिल्लामा कर्फ्यू आदेश जारी गर्दै आएको छ।
कर्फ्यू आदेश जिल्लाका विभिन्न चार पालिकामा त्यस्तो जारी गरिएको छ।
तुलसीपुरमा पूर्वमा हात्ती खौवा चोक, पश्चिममा दुधेनाको कृष्ण मन्दिर, उत्तरमा रक्षाचौरस्थित राप्ती आँखा अस्पताल र दक्षिणमा टरिगाउँ एयरपोर्ट कर्फ्यू आदेश लागू गरिएको छ।
त्यस्तै, घोराहीमा पश्चिममा झिगौंरा चोक, दक्षिणमा प्रहरी बोर्डिङदेखि गोरखा बोर्डिङ स्कूल नजिकको कटुवा खोला पुल, पूर्वमा मितेर हस्पिटलदेखि रझेना स्कूलसम्म र उत्तरमा फुर्सेखाली ढोरेनी स्कुलदेखि सेवार खोलासम्म कर्फ्यू आदेश जारी रहने छ।
त्यस्तै लमहीमा पूर्वमा अर्नवा, पश्चिममा अर्जुन खोला पुल र दक्षिणमा कोलहीसम्म कर्फ्यू आदेश जारी गरिएको छ।
त्यस्तै राप्ती गाउँपालिकामा प्रदेशसभा, मुख्यमन्त्री तथा मन्त्रिपरिषदको कार्यालय रहेको क्षेत्र र भालुवाङ बजार क्षेत्र भित्र, पश्चिममा गोपी नाला र पूर्वमा भालुवाङ पुलसम्म कर्फ्यू आदेश जारी गरिएको छ।
स्थानीय प्रशासनले तोकिएको अवधिसम्म आवातजावात गर्न, कुनै पनि प्रकारको भेला, जुलुस, प्रदर्शन, सभा, बैठक, घेरा गर्न नपाइने चेतावनी दिइएको छ।
-1746009348.jpg)
