सुर्खेतमा नगर प्रहरीले सडकमा बसेर डोकोमा काफल बेचिरहेकी एक जना महिलाको काफल खोसेर सडकमा पोखिदिएको घटनाको चौतर्फी आलोचना भइरहेको छ।
कयौं सामाजिक सञ्जाल प्रयोगकर्ताले एक सामान्य महिलाले सडक किनारमा बसेर काफल बेचिरहँदा नगर प्रहरीले त्यो खोसेर सडकमा पोखिदिएको घटनाको व्यापक विरोध गर्न थालेका छन्।
पूर्वमन्त्री लोकेन्द्र विष्ट मगरले आफ्नो सामाजिक सञ्जालमा नगर प्रहरीले काफल सडकमा पोख्दै गरेको तस्बिर राखेर प्रश्न गरेका छन्, ‘यति हदसम्म त नगए नि हुने। यो त अति भयो। बिक्री गर्ने ठाउँ निश्चित गरेर त्यहाँ बसेर बेच भनेर भन्न नमिल्ने रहेछ र?’
सामप्रसाद सुवेदी ‘संगम’ नामक फेसबुक प्रयोगकर्ताले सामाजिक संजालमा तस्बिर सेयर गर्दै घटनाको विरोधमा यस्तो लेखेका छन्।
‘मेरो आमाले पनि यस्तै बर्खाका झरीमा दाङका जंगल–जंगल चहारेर च्याउ टिप्नुहुन्थ्यो, अनि वैशाख–जेठको चर्को घाममा सल्यानका दमारहरूमा काफल खोजेर ल्याई बेचेर हाम्रो परिवार चलाउनुहुन्थ्यो। त्यही संघर्षको कमाइले म सहित ४ दाजुभाइ–दिदीबहिनीले १० कक्षासम्म पढ्ने अवसर पायौं।
आज यो तस्बिर देख्दा ती सबै दुःख, संघर्ष र आमाका पसिनाका कथा फेरि आँखाअघि आए। अनायास आँखा रसाए।
गरिबी अपराध होइन, पेट पाल्नका लागि गरिने मेहनत अपमानित हुनुपर्ने कुरा झन हुँदै होइन।
यदि यस्ता गरिब, दुःखी र श्रमिक आमाबुबामाथि अमानवीय व्यवहार गर्नेहरूका विरूद्ध आवाज उठाउँदा गाली खानुपर्छ भने, म त्यो गाली सहन तयार छु।
मानवता भन्दा माथि कुनै नियम हुनु हुँदैन।
यस्ता घटनामा संलग्न जो–कोहीमाथि निष्पक्ष छानबिन र आवश्यक कारबाही होस्।’
यी सबै सामाजिक संजाल प्रयोगकर्ताले आफूले राखेको तस्बिर भने घटनाको वास्तविक तस्बिर नभएको नगरका जिम्मेवार व्यक्तिहरूले बताएका छन्।
नगर प्रहरी प्रमुख चालिसे र मेयरले के भने?
हामीले ती महिलासँग डोकोको काफल खोसेर पोखेको घटनाबारे वीरेन्द्रनगर नगरका नगर प्रहरी प्रमुख हवल्दार पदम चालिसेसँग बुझेका थियौं।
नगर प्रहरी हवल्दार चालिसेका अनुसार त्यो घटना मंगलबार बेलुकी साढे ५ बजेतिर वीरेन्द्रनगर–८ बसपार्कको गेट नजिक भएको थियो।
चालिसेका अनुसार घटना हुँदा उनी बजार अनुगमनमा गएका थिएनन्। हवल्दारद्वय भूपाल लामिछाने र रमेश बोहराको नेतृत्वमा टोली अनुगमनमा गएको थियो।
‘बसपार्कको गेट नजिकै हाम्रो गाडी पुग्दा उहाँ डोको बोकेर भाग्न खोज्नु भएको रहेछ,’ चालिसेले भने, ‘त्यही क्रममा रोक्न खोज्दा दुर्घटनाबस महिलाको डोकोको काफल भुइँमा पोखिएको भन्ने छ।’
ती महिला को हुन्? भन्नेबारे हालसम्म पहिचान भइसकेको छैन। आफ्नो काफल खोसेर पोखिदिएकोबारे नगरपालिकामा गुनासो गर्न कोही पनि आएको छैन। नगर प्रमुख चालिसेले बसपार्कको गेटमै डोको, नाङ्लो, डालो राखेर बसिदिँदा दुर्घटनाको जोखिम बढेको र सवारी आवागमनमा बाधा पुगेको हुँदा उनीहरूलाई हटाउनु परेको बताए। २०८१ माघमा नगर प्रहरी नियुक्त गरिएयता सडक फुटपाथमा हुँदै आएको ‘डोके र पोके’ का व्यापार हटाउने क्रम सुरू भएको हो।
‘सकभर हाम्रो उद्देश्य उनीहरू भागून् भन्ने चाहना हुन्छ,’ नगर प्रमुख चालिसेले भने, ‘गरिबका डोको पोकाका सामान खोस्नु नपरोस् भन्ने हाम्रो चाहना हुन्छ।’
उनले नगर प्रहरी गठन भएयता केही अटेरी गरी सडकमा व्यापार गर्नेहरूको सामान केहीबेरलाई खोसेर फिर्ता गर्ने गरिएको भए पनि हालसम्म एक जनाको सामान पनि जफत नगरेको दाबी गरे।
‘हिजोको घटना जे भयो त्यो राम्रो पक्ष होइन,’ उनले भने, ‘मैले पनि भिडिओ हेरेर थाहा पाएको हुँ।’
नेकपा (एमाले) बाट निर्वाचित मेयर मोहनमाया ढकाल (भण्डारी) ले पनि अकस्मात घटना भएको बताइन्।
‘मैले बिहान भिडिओ देखेपछि त्यसबारे बुझेकी थिएँ। त्यो बसपार्क गेट नजिकको घटना रहेछ। गाडी ओहोर दोहोर गरिरहने संवेदनशील ठाउँमा नबस्नुहोस् भन्दा उहाँ डराएर भाग्ने क्रममा घटना भएको हो भन्ने मैले थाहा पाएँ,’ मेयर ढकालले भनिन्, ‘तर, मानव अधिकारका दृष्टिकोणले जे घटना भयो त्यो राम्रो भएन भन्ने मलाई लागेको छ। मैले ती महिला को हुन् खोजेर ल्याउन र भएको क्षतिपूर्ति उपलब्ध गराउन निर्देशन दिइसकेकी छु।’
उनले सिजनका फलफूल बेच्नका लागि नगरपालिकाले छुट्टै ठाउँको व्यवस्था गरिदिएको भए पनि त्यहाँ उनीहरू नबस्दा समस्या भइरहेको मेयर ढकालले बताइन्।
काफल बेच्ने ती महिलाको खोजीका लागि मानिसहरू खटाइएको र प्रहरीसँग पनि बुझ्ने कार्य भइरहेको उनले बताइन्।
सुर्खेतका मुद्दा शाखाका प्रमुख दीपक मगराठीले हालसम्म त्यस घटनाबारे कोही पनि निवेदन लिएर नआएको बताए।
