उपकुलपति नियुक्ति प्रक्रिया सुरू गरिएका ८ वटा विश्वविद्यालयको उपकुलपति पदका लागि दुई सय १८ जनाबाट आवेदन आएको छ।
विश्वविद्यालयहरूको कुलपति प्रधानमन्त्री र सहकुलपति शिक्षा मन्त्री रहने व्यवस्था छ।
विभिन्न विश्वविद्यालयको उपकुलपति छनोट तथा सिफारिससम्बन्धी एकीकृत कार्यविधि बनाएर उपकुलपति छनोट प्रक्रिया सुरू भएको हो। कार्यविधि एकीकृत बने पनि उपकुलपति छनोट प्रक्रिया पुरानै प्रक्रियाअनुसार अघि बढेको छ।
८ विश्वविद्यालयमा उपकुलपतिका लागि आवेदन माग हुँदा २१८ जनाबाट आवेदन प्राप्त भएको शिक्षा मन्त्रालयले जनाएको छ। वैशाख २५ गते सूचना निकालेर उपकुलपतिका लागि आवेदन माग भएको थियो।
जसमध्ये त्रिभुवन विश्वविद्यालय उपकुलपतिका लागि सबैभन्दा धेरै आवेदन परेको छ।
त्रिवि उपकुलपतिका लागि ५० जनाले आवेदन दिएका हुन्।
पूर्वाञ्चल र पोखरा विश्वविद्यालय उपकुलपतिका लागि ३८-३८ जनाको उम्मेदवारी परेको छ।
राजर्षि जनक विश्वविद्यालयका लागि २७, सुदूरपश्चिम विश्वविद्यालयका लागि १९, मध्यपश्चिम विश्वविद्यालयका लागि २०, लुम्बिनी बौद्ध विश्वविद्यालयका लागि १९ र कृषि तथा वन विज्ञान विश्वविद्यालयका लागि १५ जनाबाट आवेदन प्राप्त भएको मन्त्रालयले जनाएको छ।
