नुवाकोटको बेत्रावतीमा लेदो सहितको बाढीले पुरिएको एउटा घरबाट दुई दिनमा २४ वटा शव निकालिएको छ।
विदुर नगरपालिका–१० बेत्रावतीस्थित तीनतले घरबाट सोमबार र मंगलबार गरी २४ शव निकालिएको हो।
शवहरू व्यवस्थापन तथा पहिचानका लागि विभिन्न अस्पताल पठाइएको प्रहरीले जनाएको छ।
भदौ १० गते आएको बाढीपछि बेत्रावती क्षेत्रमा थुप्रै मानिस बेपत्ता भएका थिए। बाढीले घर वरिपरि ठूलो मात्रामा लेदो थुपारेपछि कतिपय स्थानमा उद्धार टोलीलाई घरसम्म पुग्नसमेत कठिन भएको थियो।
यही क्रममा प्रहरी प्रधान कार्यालय नक्सालले खोजी तथा उद्धारका लागि विभिन्न टोली परिचालन गरेको थियो। नुवाकोट क्षेत्रमा एसएसपी विमलराज कँडेलको नेतृत्वमा टोली खटिएको थियो।
घरमा पुग्न नसकेपछि ड्रोनबाट रेकी
बाढीले घर वरिपरि लेदो थुपारेका कारण उद्धार टोलीले टाढैबाट ड्रोन उडाएर घरहरूको रेकी थालेको जिल्ला प्रहरी कार्यालय नुवाकोटका एसपी विपिन रेग्मीले जानकारी दिए।
उनका अनुसार ड्रोनबाट गरिएको रेकी क्रममा उक्त घरभित्र शव रहेको देखिएपछि उद्धार टोली परिचालन गरिएको थियो।
'बाढीले घर वरिपरि सबै लेदो जमेको थियो। घरसम्म जान सक्ने अवस्था थिएन। त्यसपछि एसएसपी कँडेल सरको कमान्डमा खटिएको टोलीले ड्रोनमार्फत रेकी गरेको थियो,' रेग्मीले भने, 'रेकी गर्दा घरभित्र शव रहेको थाहा भएपछि अर्को टोली परिचालन गरेर खोजी तथा उद्धार सुरू गरिएको हो।'
घरभित्र कतिपय शव लेदोमा पुरिएको अवस्थामा फेला परेको उनले बताए।
'आधा पुरिएको अवस्थासम्मका शव थिए। तिनलाई पनि बल्लबल्ल निकाल्यौं,' उनले भने।
एउटै घरमा किन भेटिए धेरै शव?
प्रहरीका अनुसार उक्त घरको भुइँतलामा उत्तरगया मिनी मार्ट सञ्चालनमा थियो। धेरैजसो शव घरको भुइँतलामै फेला परेका छन् भने केही माथिल्लो तलामा पनि भेटिएका छन्।
तर एउटै घरमा यति धेरै शव भेटिनुको यकिन कारण खुल्न नसकेको प्रहरीले जनाएको छ।
'धेरैजसो शव ग्राउन्ड फ्लोरमै भेटिएका छन्। कतिपय माथि पनि छन्। मिनी मार्ट भएकाले त्यहाँ धेरै मानिस जम्मा भएको हुन सक्छ। कतिपय शव बाढीले बगाएर ल्याएका पनि हुन सक्छन्,' एसपी रेग्मीले भने, 'एकै ठाउँमा धेरै शव फेला पर्नुको यकिन कारण अहिले नै भन्न सकिने अवस्था छैन।'
अन्य घर र नदी किनारमा पनि खोजी
२४ शव निकालिएपछि प्रहरीले आसपासका अन्य घरमा पनि खोजी तीव्र पारेको छ। तालिमप्राप्त कुकुरसहितको टोली परिचालन गरेर घर–घरमा खोजी भइरहेको एसपी रेग्मीले बताए।
नदी किनारमा समेत खोजी जारी छ।
भदौ १० गते रसुवाको भोटेकोशी हुँदै आएको बाढीले नुवाकोटसहित विभिन्न क्षेत्रमा ठूलो मानवीय तथा भौतिक क्षति पुर्याएको छ। मंगलबारसम्म एक हजारभन्दा बढी शव फेला परिसकेको प्रहरीले जनाएको छ भने झन्डै चार हजार मानिस अझै सम्पर्कविहीन छन्।
बेपत्ताको खोजी तथा उद्धारका लागि नेपाल प्रहरी, सशस्त्र प्रहरी र नेपाली सेनाका टोली परिचालन भइरहेका छन्।
-1788258382.jpeg)
