करिब १२ जना भित्रै फसेको आशंका गरिएको रसुवागढी जलविद्युत आयोजनामा आज पनि सबै उद्धार सामग्री पुग्न नसकेको आयोजनाले जनाएको छ।
रसुवागढी हाइड्रोपावर कम्पनीका सम्पर्कविहीन ९३ जनाको खोजी तथा उद्धार कार्य जारी रहेको छ।
कम्पनीका नियमित कर्मचारी ५१ जना, सञ्चालक एक जना, दैनिक ज्यालादारी कामदार दुई जना र तीनवटा ठेकेदार कम्पनीका ३९ जना सम्पर्कविहीन छन्।
विद्युत गृहभित्र रहेका कर्मचारीको उद्धारका लागि विद्युत गृहको सुरुङभित्र रहेको लेदो तथा मलबे हटाउन आवश्यक मिनी एक्स्काभेटर, ३० केभिए डिजेल जेनेरेटर, सबमर्सिबल पम्प, होज पाइपलगायत सामग्री भदौ १७ गते नै धुन्चे हुँदै आयोजनास्थल पुर्याउन नुवाकोटको मैथली आर्मी क्याम्प बट्टारमा प्याक गरिएको थियो।
तर, नेपाली सेनाको उद्धार टोलीले विद्युत्गृहमा लैजान रेकी गर्दा विद्युत्गृह अगाडिको स्थानमा नदीले थप कटान गरेको र उपकरणसहितको ठूलो हेलिकप्टर (आर्मीको एमआई–१७) अवतरण गर्न नसक्ने जानकारी गराएको थियो।
त्यसपछि सानो क्षमताको कम तौलको जेनेरेटर खरिद गरी मिनी एक्स्काभेटर र ठूलो डिजेल जेनेरेटरबाहेकका बिजुली लगायत अन्य सामग्री पठाउन पहल गरि धुन्चेसम्म पुर्याइएको कम्पनीले जनाएको छ। अहिले पनि ती सामग्री धुन्चेमै छन्।
विद्युत गृहभन्दा बाहिरबाट सम्पर्कविहीन भएकाहरूको खोजी तथा उद्धारका लागि कम्पनीले नेपाल नेसनल माउन्टेन गाइड एसोसिएसनसँग सम्बन्धित दक्ष तथा अनुभवी रक क्लाइम्बरमार्फत घट्टेखोला क्याम्प र सो क्षेत्रमाथि ग्राउन्ड सर्च गर्ने गरी भदौ १८ गते हिमालय समिट क्लब प्रालिसँग सम्झौता गरेको छ।
उनीहरू चार दिनका लागि आयोजनास्थलमा परिचालन भएका छन्।
हाल उनीहरू टिमुरेमा रहेको र आज अर्को हेलिकप्टर लगाएर घट्टेखोला गई उक्त क्षेत्रमा खोजी गर्ने जानकारी आएको कम्पनीले जनाएको छ।
कम्पनीले कर्मचारी तथा सम्पर्क हुन नसकेका जलविद्युत् केन्द्रका कर्मचारीका परिवार तथा आफन्तलाई घटनाको अवस्थाबारे छिटो र नियमित जानकारी उपलब्ध गराउन ह्वाट्सएप समूह स्थापना गरेको छ।
त्यसबाट उपलब्ध जानकारी, खोज तथा उद्धारका क्रममा प्राप्त विवरण र प्रयासबारे कम्पनीका सञ्चालक समेत नियमित रूपमा कार्यालयमा उपस्थित भई जानकारी गराउने व्यवस्था मिलाइएको जनाएको छ।
खोजी तथा उद्धारमा आवश्यक समन्वयका लागि नुवाकोटको बट्टारमा वरिष्ठ इन्जिनियरसहित दुई जना, रसुवाको धुन्चेमा दुई जना इन्जिनियर र विद्युत्गृहको उद्धार टोलीलाई विद्युतीय जडान कार्यमा सहयोग गर्न एक जना इलेक्ट्रिकल ओभरसियरलाई तयारी अवस्थामा राखिएको कम्पनीले जनाएको छ।
धुन्चेमा नेपाली सेनाको विशेष उद्धार टोली मौसम अनुकूल हुनासाथ विद्युत्गृहमा आवश्यक टुल्स तथा इक्विपमेन्टसहित परिचालन हुन तयारी अवस्थामा रहेको जानकारी प्राप्त भएको कम्पनीले जनाएको छ।
-1746009348.jpg)
